Beeralayda Baardheere ee fatahaddii bishii Abriil ee sanadkaan dhacday saamaysay ayaa hadda dadaal ugu jira inay dibu tabcaan dalagyadii ka baaba’ay
Xasan Cali Maxamed waxaa uu ka mid yahay Beeraleyda ku tiirsan biyaha webiga oo khasaaraha xoogan kala kulmey fatahaada webiga ,waa Aabe 47 sanno jir Qoyskiisana uu ka kooban yahay ilaa 12 ruux, 6dii bishaan Juun uu iska iibiyey 4 higtar oo ka mid ah 8 higtar oo uu lahaa, kuna taalay tuulada Tarbey oo 26 KM Baardheere kaga toosan dhanka Koonfureed.
Xasan ayaa sheegay inuu sidaan u yeelay sidii uu dhaqaale ugu heli lahaa tacabka beertiisa iyo inuu iska bixiyo daymo lagu yeeshay xilligii fatahaadda.
“Afarta higtar waxaa la iga siistay 15 kun oo dollar, waxaanan hadda bilaabay inaan afartii higtar ee kale ku tabco hadda” Ayuu yiri Xasan.
