(ERGO) – Cabdirisaaq Aadan oo da’da jira 22, waxaa uu kamid yahay in ka badan 1,000 arday oo ka baaqday imtixaanka shahaadiga ee sanad-dugsiyeedka 2017/2018 oo qorshuhu ahaa inay u fariistaan billowgii bishan May, hase yeeshee fatahaaddii ka dhacday magaalada Beledweyne dabayaaqadii bishii Abriil ayey biyihii ka dhashay fatahaadda gudaha u galeen iskuullada.
Qoysaska ay ardaydan ka soo jeedaan ayaa ku barakacay fatahaadda uu webiga Shabeelle ka sameeyey, xaafado afar ah oo ay magaaladu ka kooban tahay. Waxayna intooda badan barakac ku noqdeen deegaanka Ceel-jaalle oo 12 km waqooyi-bari ka xiga Beledweyne.
Cabdirisaaq oo dhiganayay fasalka afaraad ee dugsiga sare ee Sheekh Maxamed Macallin, ayaa isaga iyo qoyskiisa oo ka kooban toddoba qof waxay markii ay fatahaaddu dhacday u barakaceen dhul taag ku yaalla xaafadda Buundo-weyn ee Beledweyne, waxay halkaas hadda degan yihiin muddo bil ah. Si ay naftooda uga badbaadsadaan biyo galay xaafadooda ayey uga baxeen gurigooda.
Xilliga qoyska Cabdirisaaq ay barakacayeen waxay aheyd 25-ka Abriil oo ay 10 maalmood oo keliya ka dhimaneyd in uu u fariisto imtixaanka, wuxuuna ku jiray diyaar-garow iyo akhrinta casharrada.
Sida uu Raadiyo Ergo u xaqiijiyey, guddoomiyaha dalladda waxbarashada FPENS ee maamusha iskuullada Beledweyne, Prof. Axmed Dhaqane, ilaa 14,000 oo arday oo dhiganayey 10 iskuul oo kuwa hoose/dhexe ayaa waxbarashadoodu ay hakad ku jirtaa muddo bil iyo bar ah saameynta fatahaadaha awgeed.
Imtixaanka fasalka u dambeeye ee dugsiga sare oo ka wada qabsoomay gobollada kale ee dalka ayaa Prof. Dhaqane, waxaa uu tilmaamay in marka ay ardaydu ku soo laabtaan guryahooda gudaha Beledweyne ay qaadi doonaan imtixaanka, ardaydana loo soo sheegi doono waqtiga la qaadayo. Cabdirisaaq Aadan wuxuu ka walwalsan yahay-se sida uu u geli doono imtixaankaas, maadaamaa buugaagtii ay casharrada ugu qornaayeen ay biyuhu la tageen.
Dhammaan iskuullada way xiran yihiin hadda, waxaana dhex ceegaago biyihii ka soo rogmaday webiga, marka laga reebo hal dugsi oo ka mid ah dugsiyadaas oo biyihii ay ka baxeen, laakiin ay dhiiqadii weli dhex taallo.
Sidoo kale, ardayda fasalka u dambeeya ee dugsiga dhexe ayaa iyaguna uu imtixaanka ka baaqday. Ardaydaas waxaa ka mid ah Miski Cali Cilmi oo 17-jir ah. Waxay dhiganeysay dugsiga hoose/dhexe ee Mujamac, waxayna raacday qoyskeeda oo u barakacay deegaanka Ceel-gaal, halkaas oo ay dulsaar ku yihiin qoys ehelkooda ah.
Miski waxay rajo ka qabtaa in ay geli doonto imtixaanka maadaamaa buugaagtii ay wax ku baraneysay oo dhan ay u badbaadeen. Waxay sheegtay in ay u diyaar-garoobi doonto gelistiisa marka ugu horreeya ee lagu dhawaaqo in la qaadayo imtixaanka.
Dad lagu qiyaasay 65,000 oo qoys ayaa ku barakacay fataahadda uu sameeyey webiga Shabeelle dabaqaayadii bishii hore. Qoysaskan ayaa u barakacay dhulal taag ah iyo deegaannada duleedka magaalada.
