Dadka beerta, kuwa ka ganacsada iyo kuwa ka xoogsada xabagta may diga ayaa sheegaya in seddexdii sano ee la soo dhaafay oo abaari ka jirtay gobolka Bari ay hoos u dhigtay wax soo saarkii xabagta iyo dhaqaalihii ka soo geli jiray.
Maxamad Samatar Yuusuf waa madaxa daladda ay ku mideysan yihiinn ganacsatada Meydiga ee gobolka Bari, isla markaana ah wakiilka rugta ganacsiga iyo wershadaha Puntland u qaabilsan ganacsiga Meydiga, wuxuu Ergo u sheegay in deganadii xabagta laga keeni jiray ee Timirshe, Tooxin, Caluula, Xaabo, Geesaley, Murcanyo, Qandal iyo Balli-dhidin, oo dhamaan gobolka Bari ka tirsan aysan hadda ka imaan,.
“110 ganacsade ayaa dhoofka maydiga ka ganacsada, sidoo kale boqolaal haween ah aya ka shaqeeya haadinta iyo kala habaynta xabagta markay timaaddo boosaas, sidoo kale gaadiidkii iyo dadkii meelaha ay ka soo baxaysay deganaa, dhamaan isku si ayey u saamaysay xabag la’aantu “Ayuu yiri Samatar.
