Qoysas kasoo barakacay abaarta oo ku sugan xero lagu barakacay oo ku taalla duleedka Gaalkacyo ayaa lacag ay iska uruuriyeen ganacsiyo ugu abuuray kuwooda ugu duruufta badan. Howshan oo billaabatay toddobaadkii hore waxaa ka faa’iidaystay 120 qof. Waxay isugu jiraan qaar la siiyay lacag caddaan ah oo ay ganacsiyo yar yar ku maal gashadaan iyo kuwo loo iibiyay agab ay ku shaqaystaan.
Muuse Cabdi Xalane oo ah horjoogaha xerada ay dadkan ku nool yihiin oo lagu magacaabo Taallo-cad oo 15 km waqooyi-bari ka xigta magaalada ayaa Raadiyo Ergo u sheegay in muddo 13 bilood ah ay dadka xerada ku nool ka aruurinayeen lacag. Maalin kasta waxaa qofkiiba laga qaadayay toban kun oo shilin Soomaali ah, xitaa kuwa aan shaqaynin waxay ka bixin jireen lacagta dawarsiga kusoo gasha.
Wuxuu xaqiijiyay in ay uruuriyeen lacag gaaraysa Shs50M ($1,724). Dadka ka faa’iidaystay maalingelintan oo deeq ah, kan ugu badan waxaa la siiyay $150, kan ugu yarna $40. “Waxaan is tusnay inaan lagu noolaan karin wax laga sugo hay’ado, sidaas daraadeed guul baan u aragnaa inay fikradeen shaqaysay oo qaarkeenna ugu daran aan shaqo u abuurnay,” ayuu yiri.
Dadka faa’iidaystay mashruuca waxaa kamid ah Xafso Axmed Maxamed oo loo iibiyay neef ari ah, miis iyo agabka hilibka lagu jar-jaro. Hooyadan oo korsata shan carruur ah oo agoon ah ayay shaqadani ka caawisay daboolidda baahida qoyskeeda. Inkastoo aysan shaqadan gaarsiinin heer ay ka baxdo xerada barakaca oo ay magaalada guri ka kiraysato, haddana waxay uga baxday cunta yaridii qoyskeeda haysatay ee ka dhalatay shaqo la’aanta.
Hadda maalin kasta waxay goobteeda cusub ee shaqada oo ku dhex taalla xerada ku qashaa hal neef oo ari ah oo ay soo amaahato. Neefka ariga ah ee qalliinka ah wuxuu Gaalkacayo ka joogaa Shs1.2M ($43). Maalinta ugu fiican waxay faa’iiddaa Shs300,000 ($11).
Xafso ayaa markii hore ka soo barakacday gudaha Itoobiya, kadib markii ay abaarta uga dhammaadeen 200 boqol oo ari ah iyo labo sac.
Shaqo abuurku kuma eka dadka ganacsiyada yar yar loo sameeyay. Waxaa sidoo kale jira 45 nin oo loo qaybiyay agabka lagu jebiyo dhagaxa. Xeradu waxaa u dhow oo rag badan oo soo barakacay ka faa’iidaystaan dhul laga qodo dhagaxa loo isticmaalo dhismaha. Gawaari ka timaada Gaalkacyo ayaa midkiiba uga buuxsada lacag dhan Shs250,000.
Axmed Cabdisalaan oo loo iibiyay burusyo, sabaradaha lagu bixiyo dhagaxa iyo badeello ayaa sheegay in maalin kasta uu jebiyo dhagax buuxin karta hal gaari. Muddo toban bilood ah oo uu xerada deggenaa, isla markaana uu shaqo la’aan ahaa waxay qoyskiisa oo ka kooban 12 qof ku noolaayeen caawimaad ay dad kale ka helaan.
Wuxuu kamid yahay dadkii ay saamaysay abaartii ugu dambaysay ee ku dhufatay gobolka Nugaal. Ari ka badan 200 oo neef iyo 12 geel ah ayuu ku waayay daaq la’aanta iyo harraadka ka dhashay abaarta.
