Nadiifo Cilmi Waasuge oo 34 jir ah waxay afar bilood ka hor maqaayad ka furatay magaalada Beledweyne oo ay u soo barakacday, kaddib markii ay xaraashtay 28 ari ah oo uga badbaaday abaarta. Go’aankan oo ay aaminsan tahay inuu yahay kii ugu saxnaa ee noloshooda beddelay wuxuu ka dhigay qof ka soo kabaneysa abaarta. Hooyadan oo haysata shan carruur ah oo agoon ah ayaa habeen kasta la hoyata $14 oo faa’iido ah. Waa lacag ugu filan biil, kirada guriga, waxbarashada carruurta iyo baahiyahooda kale ee aasaasiga ah.
“Waxaan go’aankaan u gaaray, xoolaha waxaan u sii hayo ma garanayn, nolol iiguma filnayn, waxna iigama irmaanayn. Marka waxaan is iri shaqo ku abuuro wixii ay kuu gooyaan,” ayay tiri Nadiifo. Waxay horay u ahayd xoolo-dhaqato ku nool miyiga tuulada Yasooman oo qiyaastii 30 km dhinaca bari ka xiga degmada Buulo-burte ee gobolka Hiiraan.
Saddex maalmood oo ay seyladda ku noqnoqotay waxaa u suuragashay in xoolaha oo aad caato u ahaa laga siisto $414. Waxay ahayd bishii toddobaad ee sanadkan waxayna isla bishii xigtay ku furatay maqaayaddan oo raashinka lagu kariyo uu yahay dalagga beeraha gudaha ka soo go’a. Xaruntan oo bishii looga kireeyay $30 waxay macaamiisheeda oo u badan muruqmaalka aan awoodin inay maqaayadaha waaweyn ka cunteeyaan ay ku fariistaan gogol dhulka loo fidiyo.
Nadiifo oo cuntada karisa iyo wiil adeege ah oo ay maalintii siiso $2 ayaa ah shaqaalaha maqaayadda.
Shaqadan waxay u suuragalisay inay kireysato labo qol oo baraako ah oo ay bishii ka bixiso $20. Markii hore waxay dulsaar ku ahayd qoys ay qaraabo yihiin oo deggan deegaanka Ceeljaalle ee duleedka Beledweyne. Waxay sidoo kale markii ugu horreysay saddex bilood waxbarasho gaysay labada ugu waaweyn carruurteeda oo kala ah wiil 11 jir ah iyo gabar 9 jir ah. Midkiiba waxay bishii ka bixisaa $10.
Waxay Raadiyo Ergo u sheegtay in aysan dooneyn in ay dib ugu noqoto noloshii miyiga iyo xoolo-dhaqashada. Sababtu waa iyada oo heshay shaqo fiican iyo fursadda waxbarasho ee carruurteeda oo aan oollin miyiga.
Abaarta oo deegaankeeda ka jirtay muddo saddex sano ah ayaa ka dishay 142 ari ahaa.
Saddexdii sano ee u dambeysay waxaa magaalada Beledweyne u barakacay 11,550 qof, sida uu Raadiyo Ergo u sheegay Sheekh Xuseen Cismaan Cali oo ah guddoomiye ku-xigeenka arrimaha bulshada ee maamulka gobolka Hiiraan. Dadkaan ayay abaaraha ka jira deegaanno kala duwan oo gobollada Hiiraan, Bakool iyo Bay ah ku qasbeen inay degaan 54 xero barakac oo ku yaalla magaalada iyo daafaheeda.
Guddoomiye ku-xigeenka ayaa xusay in dadkan oo qaarkood ka dawarsada magaalada ay u baahan yihiin in laga caawiyo sidii ay dib ugu noqon lahaayeen guryahooda iyo noloshoodii hore.
