Photo | Maxamed Cabdiqaadir oo shaqadiisa ku guda jira/Sawir/Faadumo Taxadar
12 August, 2015 BOOSAASO
Qaar ka mid ah qaxootiga Soomaaliyeed ee kasoo qaxay dagaallada Yaman ayaa nolol cusub ka bilaabaya magaalo xeebeedka Boosaaso ee gobolka Bari. Qaxootigan oo qaarkood dhowr iyo toban sano ku noolaayeen xerada AlKharas iyo magaalooyin kale oo ay Cadan ku jirto shaqooyin ku helaya xirfado ay Yaman kusoo barteen sida cunto-karinta, halka qaarkoodna ay abuuranayaan ganacsiyo yar yar oo ay reerahooda ka quudiyaan.
Cabdiqani Maxamed Siidey waa 30 sano jir ka mid ah kumanaan qaxooti ah oo Yaman kasoo qaxay labo bilood kahor. Isaga iyo saaxiibkii ay Yaman iskala soo qaxeen waxa ay maqaayad cunto ka fureen meel ku dhow xero ay dadka soo noqday ay ka dagan yihiin Boosaaso. “Waxaan karinnaa nooc walba oo cunto ee qofku u baahan karo, si gaar ah dadka danyarta ah,” ayuu Cabdiqani u sheegay Raadiyoow Ergo.
Kahor inta isaga iyo saaxiibkii aysan maqaayadda furin, Cabdiqani wuxuu ka fikirayay in uu u gudbo Muqdisho oo reerkiisu degan yahay, shaqo na ka heli kari lahaa. Wuxuu se ogaaday in maqaayad la’aanta deegaanka ka jirta ay tahay fursad ganacsi oo laga faa’iideysan karo. Laakiin isaga iyo saaxiibkiis oo isna ah cunto-kariye ah ma aysan heli karin dhaqaale maqaayad lagu furo. Laakiin qof kale oo ka mid ah Qaxootiga Yaman kasoo noqday oo ay fikrada la wadaageen ayaa bixiyay qarashka ku baxay furitaanka maqaayada.
“Waxaan kariyaa cuntooyin fudud oo badankood aan hore magaalada looga aqoon, oo aan kusoo bartay dalka Yaman, dadkuna aad bey u jecel yihiin,” ayuu yiri Cabdiqani oo hadda ka mid ah milkiilayaasha maqaayada. Maqaayadu hadda waxa ay shaqeysaa ilaa xilli dambe habeenkii. Cabdiqani kama fikirayo in uu meelna uga baxo Boosaaso, magaaladiisa cusub.
Cabdiqani oo keli ah ma ahan, laakiin boqollaal kale oo dhalinyaro Yaman kasoo noqotay ah ayaa iyana ganacsiyo yar yar ka furtay magaalada Boosaaso oo dhalinyarada deegaanku uga tahriibaan shaqo la’aan. Maxamed Cabdiqaadir waa aabe afar carruur ah iyo xaasleh. Lix bilood kahor ayaa kasoo qaxay xerada qaxootiga ee Alkharas oo tobankii sanno ee lasoo dhaafay uu ku noolaa.
Wuxuu dukaan lagu iibiyo khudaarta iyo cabitaanka ka furtay xero uu ka deggan yahay magaalada Boosaaso. “Waxaan ka helaa $10 ilaa $15 maalin walba, waan ku faraxsanahay wayna ku filan tahay nolosha reerkeyga, maaddaama aan dalkeenna nimid oo aan xornimo ku shaqeysaneyno waxba nagama maqna,” ayuu yiri Maxamed oo la hadlay Raadiyoow Ergo.
Si kastaba, Muuse Cali Jaamac oo ka mid ah aqoonyahannada deegaanka wuxuu sheegay in dhalinyarada kasoo noqonaya dalka Yaman ay xirfado hal-abuur, ganacsi iyo ilbaxnimo kusoo kordhin karaan magaalada.
“Xagga dhismaha, howlaha guriga, farsamada korontada iyo sameynta alaabaha iyo ganacsiga guud ahaan waa dad aad ugu dheereeya, oo waxay ka yimaadeen dal ilbaxnimo caan ku ah. Waa inaan ka faa`iideysannaa oo aan soo dhoweynaa,” ayuu yiri Muuse. Wuxuu ku boorriyay bulshada deegaanka in dhalinyarada soo noqday loo fududeeyo dhexgelka bulshada si xirfadahooda looga faa’iideysto, iyaga looga faa’iidiiyo.
Faadumo Siciid Yuusuf/FM/MR
