Photo | Haween deegaankeeda kasoo barakacday/sawir/RadioErgo
12 August, 2015 BAKOOL
Ugu yaraan afar boqol oo qoys oo xoolo-dhaqato iyo beeralley isugu jira oo ka qaxay ilaa afar tuulo oo ka tirsan gobolka Bakool ayaa gaaray degmada Tiyeegloow ee isla gobolkaas labadii toddobad ee lasoo dhaafay. Dadkan oo u badan haween iyo carruur ayaa ka qaxay tuulooyinka Ceelgaras, Sigle, Biyooley iyo Dolan-doole oo dagaal ku dhex maray ciidamada dowladda iyo kooxda Shabaab labadii toddobaad ee u dambeysay.
Dowlay Ibraahim ah oo ah kontan iyo shan sano jir waxa ay ka mid tahay labaatan qoys oo kasoo qaxay tuulada tacabka caanka ku ah ee Sigle oo 45km dhanka koofureed kaga beegan degmada Tiyeeglow. Waxa ay ka qaxeen dagaal labo maalin oo xarriir ah socday oo tuulada ku dhexmaray labada ciidan.
Dagaalka ka dhacay tuulada Sigle wuxuu kusoo beegmay xilli dadka beeralleydu isu-diyaarinayeen gurashada tacabka beeraha bartamaha Agoosto. “Gurigii, xoolihii iyo dalagii beeraha oo diyaar ah baan kasoo qaxnay. Colaad baa nasoo barakicisay,” ayey Dowlay u sheegtay Raadiyoow Ergo.
Aamino Cabdulaahi Idris waa hooyo sagaal carruur ah oo ay dhashay kala soo qaxday tuulada Dalan-doolle oo ka mid ah goobaha lagu dagaalamay. Waxa ay ku heystay labo dukaan oo ka mid ah xarumaha ganacsi ee ugu weyn tuulada, iyo guri ay lahaayeen. Balse hantideedii oo dhan waa ay kasoo qaxeen, oo banaan cidlaha oo degmada Tiyeeglow bay ka joogtaa. “Banaan cidla ah baan ku hoyanaa, noloshuna way nagu adag tahay. Laakiin nabad baan heysanaa, oo iyada baa inoo muhiim ah,” ayey tiri Aamino.
Si kastaba, Maxamuud Maxamed Yuusuf oo ah madaxa arrimaha xariirka bulshada ee maamulka degmada Tiyeeglow ayaa Raadiyoow Ergo u sheegay in aysan awoodin dib u dajinta iyo quudintab qoysaska degmada kusoo qaxay. Wuxuu intaa ku daray in qoysasku qaarkood la joogaan eheladooda oo degmada horey u deganaa, halka kuwo aan qaraabadu u joogin ay iyanau geedaha hoostiida iyo dhulka banaanka ku hoydaan.
