Xabiibo Cabdulle Yaxye waa hooyo wadata qoys ka kooban 10 carruur ah, waxayna ka mid tahay kumanaan qof oo yimid Boosaaso kana soo cararay dagaalka Yemen, waxay timid Boosaaso 2 Abriil 2015, waxay ku sugan tahay xaafadda Bilajal Carab oo ku taal xeebta Boosaaso, Xabiibo waxay isku dayday inay la qabsato bulshada deegaanka ayna maarayso nolosha qoyskeeda, waxay subax kasta u soo qaadaa ganacsi yar guddaha xerada sida kumeel gaarka ah loo dejiyey dadka ka soo noqonaya Yemen ee ku taal Boosaaso.
Weriye Faadumo Taxadar ayaana waraysigaan la yeelatay
S. Yemen maxaad ka qaban jirtay xaggeese ka deganayd?
J. Anniga Yemen caasimadda Sanca ayaan ka deganaa, dharka ayaan ka ganacsan jiray, anniga iyo carrurtayda waaweyn waa wada shaqayn jirnay.
S. Imisa sano ayaad Yemen joogtay, xageese ka tagtay markaagi hore?
J. Anniga waxaan ka tegey Muqdisho sanadkii 2001, waxaan joogay Yemen 14 sano
S. Goormaad timid Boosaaso?
J. Waxaan joogaa hadda 50 maalmood, anniga iyo ilmahayga oo 10 qof ah, kan ugu weyni yahay 25 jir, kan ugu yarinna 8 sano ayuu jiraa.
S. Xaggee ka degantahay Boosaaso?
J. Xaafadda Bilaajo Carab ee xeebta u dhow.
S. Waa sidee noloshaadu?
J. Walahay waa iska adagtahay, waxaanse bilaabay ganacsi yar oo aan alaabo ku iibiyo meelaha la dejiyo dadka ka imanaya Yemen, waxaan isku dayayaa inaan gacantayda wax kula soo baxo.
S. Maxaad iibisaa?
J: Waxaan iibiyaa cuntooyinka fudud ee ay kamid yihin jalaato, bajiye, burka la shiilo, sharaab, mashmas iyo saanbuus, alaabtaan farsamo ahaan ayaan u aqaan, guriga ayaanan ku soo farsameeyaa, kadibna anniga iyo carruurtayda kuwa roon roon ayaa soo wada qaadna.
S. Xaggee ka heshay lacagtaad ku bilowday ganacsiga, imisayse ahayd?
J. Markaan imid waxaa guddiga ganacsatadda Boosaaso oo qayb ka ah gudiga gargaarka dadka Yemen ka imanaya ay I siiyeen 720 dollar oo aan alaab aan ku seexdo iyo waxaan wax ku karsado ku iibsado, gurina ku kiraystay, wixiiii soo haray oo dhamayd 230 dollar, ayaan ku bilaabay inaan ku gato darmuusyadda jalaatadda iyo alaabta cuntooyinka lagu rido, waxaana la I siiyey lacagtaas 26 bishii Abriil 2015.
S. Maxaa kaa soo galla sideese nolosha qoyskaaga ugu maaraysaa?
J. Runtii qofku noloshiisa kama quusto, anniga markaan imid waxba ma haysan, lacag ma haysan, magaladaan galay wayna igu adkaatay noloshii, runtii guri yar oo carriish ah ayaan degey oo kiro la iiga qaato lacag dhan 25 dollar, waa iska adagtahay nooshiisu, waase nolol cusub oo aan doonayo inaan ku dhex galo dadka, waayo si fiican ayaa la iigu soo dhoweeyey Boosaaso, waana meel aan wax ka qabsan karo, alaabtaan iibiyo waxaana maalintii iga soo gala lacag 4 dollar ah oo aan ku dabaro nolol maalmeedka qoyska.
S. Maxaa dhibaato ah oo aad ku qabtaa hawshaan hadda?
J. Walaahay ma jirto wax dhib oo waxaan dareemayaa inaan shaqaysanayo, lana soo baxayo noloshayda, waxaase mararka qaar aan la iga gadan alaabta, jalaatadoo kale wakhti dheer ma hayn karto kaydiyahaygu oo markiiba way dhalaalaysaa, markaas ayey ila soo deristaa culays khasaare.
