Boqollaal qaxooti kasoo jeeda gobolka is-maamulka Soomaalida ee Itoobiya kuna sugan dalka Yemen ayaa cabsi ka qaba inay deegaannadooda dib ugu laabtaan, sababo dhanka ammaanka ah.
Qaxootigan oo muddo ka badan 20 sano ku noolaa xerada qaxootiga Alkharaz ee dalka Yemen oo saameyn ay ku yeesheen dagaallada ka socda dalkaas ayaa markoodii hore xaalado ammaan dartood uga soo hayaamay dhulkooda.
Aamina Maxamed Ibraahim oo ku nool xerada Alkharaz ayaa Ergo u sheegtay inaysan aqoon meel ay ku laabato, xitaa haddii ay hesho qarash ay dib ugu laabato.
“Dadku waxay ku wada laabanayaan deegaannada ay kasoo jeedaan, laakiin aniga ma lihi meel aan u laabto, nafteyda ayaan u baqayaa, intaan xabsi geli lahaa waxaan ka door bidayaa inaan Yemen sii joogo.” Ayay tiri Aamina.
Cabdirisaaq Nuur oo isagana ka mid ah qaxootiga Alkharaz, si la mid ah Aamina ma yaqaan meel uu ku laabto, “Haba yaraatee wax rajo ah kama lihi inaan laabto, 20sano ayaan Yemen ku noolaa, UNHCR ayaa na quudin jirtay laakiin hadda way naga jaratay, nolol xumo ayaa sidoo kale na heysata.” Ayuu yiri Cabdirisaaq.
Ruun Cabdi Cali oo ah hooyo 55-jir ah, waxay Ergo u sheegtay inay door bideyso inay Yemen ku dhimato inta ay laaban lahayd, sidoo kalena aysan dooneyn inay Soomaaliya qaxooti ku noqoto.
Guddoomiyaha jaaliyadda qaxootiga Soomaalida Itoobiya Jowhar Beddel Axmed ayaa ka codsaday hay`adaha gargaarka inay ka caawiyaan meel ammaan an oo ay ku noolaadaan.
“Haddaan Yemen ka tagno oo aan Ku laabanno Itoobiya, waxaan la mid nahay dad biyo ka baxay oo dab ku dhacay, marka meel kale ayaan codsaneynaa oo aan ku noolaanno.” Ayuu yiri Jowhar.
Boqollaal qoysas qaxooti Soomaaliyeed ah oo kasoo cararaya dagaallada ka socda dalka Yemen ayaa dib ugu laabanayay Soomaaliya bilooyinkii ugu dambeeyay.
