Dekedda Mukalla ee wadanka Yemen ayaa waxaa gaaraya kumanaan qof oo Soomaali kuwaasoo quudarreynaya inay helaan wadadii ay ugu bixi lahaayeen dhanka Soomaaliya,waxayna ka kala yimaadeen magaalooyin kala duwan oo ka tirsan dalkaasi ayagoo ka baxsanaya dagaallada ka socda.
Duruufaha nolaleed iyo dhaqaalaha oo ku adag dadkaasi ayaa sii xumaynaya xaaladda, siduu sheegay Cabdullahi Shariif Cismaan oo ah madaxda hay’adda la yiraahdo Jimciyatu Al-birri kana shaqaysa arrimaha gargaarka, dadka Soomaaliyeed ee ku sugan magaalada Mukalla, waxaa khadka taleefoonka kula xirriiray Maxamed Xasan oo ka tirsan Radio Ergo ugu horreyna waydiiyey sida ay tahay xaaladda dadkaasi Soomaalida ah.
Cabdullaahi Shariif: Dadka Soomaalida ee halkan ku sugan way dhiban yihiin waana dadka ay saameeyeen xaaladda dagaalka ee wadanka Yeman, ganacsatada ayaan dhaqaalo uga soo ururinaa iyo raashin xarumo iskuulana waa dajinaa.
Ergo: Dad intee le’eg ayaa ku sugan Mukalla oo Soomaaliya?
Cabdullaahi: waxay gaaraayn ilaa 3000 kun oo qoys kuwaasoo la dejiyey lix goobood oo ah iskuulo wax barasho, balse waxaa jira dad kale oo ilaa shalay yimid oo aan ku qiyaasnay ilaa 1600 oo qof, iyadoo kuwo kalena jidka ku soo jiraan.
Ergo: Waxaad ka warrantaa dadka u dhoofaya Soomaaliya?
Cabdullaahi: Soomaalida 70% inay Soomaaliya aadaan bay rabaan laakiin ma haystaan dhaqaale iyo gacan caawisa toona, waxaan doonaynaa hadda inaan hal xarun isugu keeno si wax u qabadkoodu u fududaado.
Ergo: Ma la socodsiiseen dawladda Soomaaliya inay gacan siin karto dadkaan?
Cabdulaahi: Haa waxaan la xiriirnay qunsulkii Soomaaliya ee Yemen Fadhiyey Axmed Suudaani, isaguna wuxuu noo sheegay inuu dadaal ku jiro waana sugaynaa.
.Ergo : Idinku ka jamciyad ahaan maxaad dadkaas u qaban kartaan?
Cabdullaahi: Annaga waxaan u samaynaa soo dhawayn, meelaha ay degi lahaayeen iyo in aan u soo ururino lacago si ay ugu baxaan laakiin kuma filna intaas dadku waa badan yahay, hadda waxaan diyaarinaynaa doon khaasa oo wixii ay qaadi karto aan saarno.
Ergo: Xagee u rareysaan doontaas aad sheegtay?
Cabdullaahi: Boosaaso ayey aadayesaa toddobaadka danbe ayeyn baxaysaa.
Cabdullaahi ayaa intaas ku daray in ganacsato wanaag doon ah oo reer Mukalla ayaa gacan qabasho laga heli jiray, haddase taasi waa istaagtay, oo way noo sheegeen ayuu yiri inay ka weyn tahay awoodooda xaaladda dadkaani, isagoona codsi u diray hay’addaha gargaarka iyo dawladda Soomaaliya sidii gacan loo siin lahaa dadkaan faraha badan ee doonaya inay aadaan wadankood.
