Cabdulaahi Xaashi Qoobdeero oo ah wasiir ku xigeenka arrimaha guddaha Puntland ahna masuulka maamulku u xilsaaray qaabilista iyo dejinta dadka ka imanaya Yemen ayaa Ergo u sheegay in culays badani ka jiro sidii dadkaan imanaya loogu sii gudbin lahaa goobahay asalkoodii ka yimaadeen, isagoona sheegay in Puntland dadka yimid tan iyo intii dagaalka Yemen bilowday ay tiradoodu ka badan tahay 5 kun oo qof.
“Iskaashi saddex geesood ah una dhexeeyey ganacsatadda Puntland, maamulka iyo hay’addaha gargaarka ayaan ku shaqaynayney, runtii doontii doraad timid waa tii dadka ugu badan siday, awoodeenana way ka badan tahay, doontaas oo siday 1720 qof, 920 qof ayaa is deberay, waxaanse xeradda dadka la dejinayo geynay 800 oo qof, dadkaan oo quud daraynaya in loo dhoofiyo deeganadii ay horay uga soo qaxeen, iyadoo dadkaan qaar ka mid ahi xanuunno la il daran yihiin, aysanna maamul ahaan baahiya jira wax ka wada qaban karin.”
Muna Xasan Cumar oo wadata 2 carruur ah iyo odaygeeda oo qaba cudurka sonkorowga ayaa Ergo u sheegay inay u socoto magaaladda Marka oo ay 12 sano ka hor uga qaxday dhinaca Yemen, aysanna wax haysan, dhibaatada ugu daranse ay tahay saygeeda oo sonkor qaba dhowr goorna ku galay kooma meesha sida ku meel gaarka ah loo geeyey.
“120 dollar ayaa la yiri waa la idin siinayaa dhulkiinana waad maraysaan, inta la sugayo sahaydaas ayaa runtii dhibaato ah, xaaladda odaygaa iigu daran oo u baahan caafimaad degdeg ah, iyadoo saxadda meesha aan ku jirnaana xuntahay waayo dadkii ayaa ka batay.”
Wiilo Cabdulaahi Barre oo ah haweenay uur leh, ayaa sheegtay “Anniga 4 carruur ah ayaan wataa, waa la i qoray, anniga 20 sano ka hor ayaan ka cararay Muqdisho oo Cadan ayaan ku noolaa kana soo tegey hadda, Muqdisho ayaan u socdaa jawaab ma helin, meeshaan hadda aan joogo way buux dhaaftay, saxaddu ma fiicna, durba carruurtii shuban ayey bilawday, mana ahan meel aan ku sii jiri karno, marka waxaan codsanaynaa in si dhakhso leh naloo noolyo.”
Maamulka Puntland ayaa ka dayrinaya in dad hor leh oo yimaadda ay xaalada uga sii dari karto loona bahan yahay in gacan dheeraad ah laga hello bulshadda Soomaaliyeed iyo hay’addaha gargaarka iyadoo dad 960 qof oo sugaya in loo dhoofiyo goobahay ka yimaadeen ay ku jiraan goobta ku meel gaarka loo dejiyey, cimiladda oo hada kulul iyo dadkoo bandanna hadday ku daahan goobta ay tahay dhibaato kale.
