Sedex kun oo qof oo Soomaali ah kana soo cararay dagaallada ka socda magaalooyinka waawayn ee dalka Yeman gaar ahaan Cadan ayaa la sheegayaa inay hoyi la’aan, cunto la,aan, caafimaad darro iyo dhibaatooyin kale ku haystaan xerada qaxootiga Al-kharaz ee dalkaasi.
Xabiibo Dahir Maxamuud waa hooyo haysata 5 carruur ah oo agoon ah kana soo carartay xaafadda Basaatiin ee magaalada Cadan waxay Ergo u sheegtay in carruurteeda ay la jiifaan gaajo, hoyi la,aan, duruufo kale, ayadoo xustay in xerada Al-kharz ay timid laba bilood ka hor ayna dul saar ku ahayd qoyska kale balse dhawaan loo hseegay in ay ka guurto sidaasna ay hadda meel banaan ah joogto.
Dagaallada ka hor waxaan ahaa adeegto ka shaqaysa guryaha si aan u soo saaro biilka carruurta, wadankan waxaan ku noolaa 18 sano wax dhib ahna kuma qabin.
Sh Cabdiraxmaan Maxamed Cumar ayaa Raadiyaha Ergo u sheegay in 18 sano uu ku noolaa dalka Yeman uuna haysto 9 carruur ah oo hooyadood ay indho la’adahay bil ka hor ayuu ka soo qaxay xaafadda Basaatiin ee magaalada Cadan, wuxuu yiri carruurta waxaan ku quudiyaa in dadka aan ka baryo kilo bariis ama kilo bur ama lacag yar oo aan waxba goyn, dagaallada ka hor ayuu sheegay in uu ahaa Sheekh isku mehrriya ragga iyo dumarka.
“Waxaan haystaa 5 carruur ah waxaa joogaa xerada Al-kharaz muddo bil ah da’adeydu waa 31 jir, halkan waxaan u imid ammaanka awgiis balse waxaan kala kulmay noolal adag oo dhan walba taabanaysa gaar ahaan waxyaabaha aasaasiga sida cunnada, hoyiga, caafimaadka intaba ma haysanno maalin walba waxaan dadka xerada ka baryaa qaado bariisa ah, xabad canjeero ah si aan nafta ugu celino”. sidaa waxaa sheegtay Siciido Cismaan.
Waxay intaa raacisay in Carruurteeda aabahood ay uga soo tagay Cadan ayna ka warqabin xaaladiisa, ka hor inta aysan soo qixin waxay sheegtay in ninkeeda uu dhaqi jiraybaabuurta ayaduna ay ahayad adeegto ka shaqaysa guraha sidaasna ay ku tiirsanaynd nolasha qoyskooda, waxay xustay in nolasha ay hadda ku jiraan ay adagtahay,Yemen ayey sheegtay inay ku noolaayeen 14 sano, waxay codsatay in Soomaaliya la geeyo si ay uga baxdo noolasha colaadda iyo duruufaha adag ay isku biirsadeen.
Guddoomiyaha Gudiga Diiwaangelinta Qaxootiga Cusub ee Xerada al-kharaz ayaa Radio Ergo u sheegay in 3000 kun oo qof ay diiwaan galinyeen una gudbiyeen UNHCR, wuxuu xusay inay jiraan dad hoyi ka dhigtay geedaha hoostooda, wuxuuse intaa raaciyey inay jiraan qoysas markii ay xerada ka waayeen caawimaad bani’aadamnimo ay doorbideen inay dib ugu noqdaan magaalada Cadan oo markii hore ay kas oo qaxeen walina ay ka jirto dhibaatada ammaan darro,
Dadkan ayaa waxay dhammaan codsadeen in lagu caawiyo sidii ay Soomaaliya ku aadi lahayn maadaama ay adagtahay nolasha xilligan ka jirta xerada Al-kharaz oo ay u soo barakaceen.
