Dadka deegaanadooda kasoo barakacay ee ku nool xeryaha degmada Ceelwaaq ee gobolka Gedo ayaa ka welwelsan inay ku guryo waayeen roobka guga ee deegaanka ka curtay. Roobka oo dabeylo xoogan wata ayaa deegaanka ka da’ay toddobaadkii hore.
Mukhtaar Maxamed oo ka mid ah Guddiga Dadka Soo Barakacay wuxuu sheegay in roobku dumiyay tiro guryo ah oo ku yaalay xeryaha duleedka magaalada dhaca. Degmada Ceelwaaq waxaa ku yaal ilaa lix xero oo ay ku nool yihiin dad dhan saddex kun oo qof oo kasoo barakacay gobolada Bay, Bakool, Jubooyinka iyo qeybo ka mid ah gobolka Gedo. Dadkaa waxay kasoo qaxeen abaaro iyo dagaalo deegaanadooda kusoo noqnoqday
Dadka soo barakacay ayaa badi ku nool guryo cooshado ka sameysan oo aan iska xajin karin dabeysha iyo roobka xoogan. Mukhtaar wuxuu ka digay in nolosha saddexdaa kun ee qof ee ku nool xeryaha duleedka Ceelwaaq ku yaal ay halis geli karto haddii roobka dabeylaha wata uu sii socdo.
