Qaxooti Soomaali ah oo ku noolaa magaalooyinka Yemen ayaa ku qulqulaya xeryaha saxaraha ku yaal ee Alkharas. Qaxootigan ayaa xeryaha badbaado ahaan u aadaya iyaga oo ka qaxaya magaalooyin ay Cadan ka mid tahay oo ay dagaallo ku dhex marayaan ciidamada dowladda iyo shiicada hubeysan ee Xuutiyiinta la yiraahdo. Weriyaha Raadiyoow Ergo ee xeryaha qaxootiga ee Alkharas wuxuu soo sheegayaa inay xerooyinku buux dhaafeen iyada oo qaxootiga qaar ay dibad yaal yihiin.
Laakiin xerada oo ay ku nool yihiin qaxooti Soomaali ah oo ka badan soddon iyo shan kun oo qof ayaa waxaa isaga baxay hey’adaha gargaarka ee ka howl-geli jiray. Cali Maxamed Yuusuf oo saddex iyo labaatan sano ka badan ku nool xerada AlKharas ayaa sheegay in hal hey’ad oo maxalli ah ay hadda xerada ka howl-gasho.
“Cuntada iyo biyaha waa gabaabsi oo hey’adaha adeegyada bixin jiray oo dhan xerada wey isaga tageen,” ayuu Raadiyoow Ergo sheegay Cali. Wuxuu intaa ku daray in qaxootiga la siiyay raashin bil iyo bar ay isticmaali karaan dhammaadkii bishii hore.
Adeegyada caafimaadka iyo dugsiyada waxbarashada xerada ayaa sidoo kale xirmay. Hey’adihii bixin jiray adeegyadaas oo muhiim u ah nolol maalmeedka qaxootiga ayaa cabsi ammaan darteed xerada uga baxay. Ardey ka badan afar kun ayaa horey wax uga baran jiray dugsiya hoose iyo sare ee keli ah ee xeryaha ku yaal.
Faadumo Aadan Maxamed oo ah carruurleey xerada ku sugan waxey ugu baaqeysaa dowladda Soomaaliya iyo hey’adaha gargaarka in qaxootiga la daad-gureeyo oo dhul iyo dalal kale oo nabad ah la geeyo xitaa haddii aan dib loogu celin karin Soomaaliya.
“Hadda adeegyada caafimaadka iyo waxbarashada xerada oo dhan hakad bay ku jiraan. Biyaha iyo cuntaduna waa nagu gabaabsi. Marka waa in dalkeenna dib na loogu celiyo ama dal kale nala geeyo kahor inta uusan xaalku xumaan,” ayey tiri Faadumo Aadan oo la hadashay weriyaha Ergo ee xeryaha AlKharas.
