Beeraleyda degmada Baardheere ayaa sheegay in labadii todobaad ee ugu danbaysay ay suuq fiican ka helay wax soo saarkoodu inay u iib geeyaan magaalooyinka ay ka mid yihiin Muqdisho, Baydhabo, Diinsoor, Baladxaawo, Garbahaarey iyo Ceelwaaq, dhaqdhaqaaqaan ganacsi ayaa rajo geliyey Beeraleyda si ay kor ugu qaadaan wax soo saarkooda.
Cabdulaahi Xuseen oo ka mid ah gudiga beeraleyda waraabka degmada Baardheere oo wareysi siiyey radiyaha Ergo ayaa sheegay beeraleyda deeganka xilligan in ay ka faa,ideysteen dalagyada u soo go,ay, isagoo sheegayna maalin walba in ay magaalada ka baxaan 15 baabuur oo sida noocyo kale gedisan oo qudaar ah ayna ka mid yihiin yaanyada, basasha, karootada, bocorka, barbarooniga iyo dalagyo kale oo ay ka mid yihiin liin dhanaanta.
Madiino Cabdiraxmaan sheekh oo ka mid ah haweenka suuqa Baardheere ku iibiya qudaarta ayaa sheegtay in isbedel xaga ganacsiga qudaarta uu jiro, ayna keentay kobac dhaqaale oo ka daremayaan suuqa.
Madina ayaa sheegtay in tenegii 10kg qaadayey ee yaanyada oo Baardheere ka mari jirey labo todobaad ka hor 10kun oo sh.so, hadda waxaa lagu iibinayaa 35kun oo sh.so.
Cali Xuseen oo ka mid ah ganacsatada qudaarta ee degmada Ceelwaaq ayaa sheegay noocyada qudaarta laga isticmaalo degmada in laga keeno degmada Baardheere, isagoona sheegay in ay si toos ah xiriir ula leeyihiin beeraleyda degmada.
Beeralayda ayaa sheega inay markii ugu horaysay ee dhaqdhaqaaq ganacsi oo noocan ah ay arkaan 20 sano ee ugu danbaysa, ayna dhiiri gelinayso wax beerista deegaankaas, korna u qaadayso dhaqalaha soo gala.
