Barakacayaashii ka yimid gobolka Bakool ee ku sugan magaladda Baydhabo ayaa helay hoy, dadkaan oo dhibaato ka haysatay hoyga ayaana sheegaya inay wakhtigaan ka nasteen kulaylkii darnaa iyo dhaxantii habeenkii, 70 qoys oo ah iyagu kuwii ka yimid gobolka Bakool ayaa helay guryahaan, hay,adda guddiga qaxootiga Norway ee NRC iyo maamulka demada Baydhabo ayaa barakacyaashan guriyahan cusub u dhisey, waxaana laga dhisay ADC3 kuna taala duleedka koonfureed ee Baydhabo.
Sumayo Iimaan Axmed da,adeedo waa 80-sano jir, markeedii hore waxay kasoo barakacdey degmada Waajid ee gobalka bakool sanad ka hor, waxayna u sheegtay weriyaha Ergo ee Baydhabo “Bakool ayaan ka imid, abaar daran ayaan kasoo barakacney, hadda Alle ayaa mahad leh, waayo mudo 7-bilod ah ayaa qorax kor keena ku dhamaaneysey anaga iyo carruurteena, waa inoo farxad in wakhti roobadka soo socda aan ka galno jiingadahan, aad ayaa ugu faraxney, xaley iyo habeen hore qabowgii nagu dhici jirey habeenkii waa ka nasaney.”
Caasho Cali Cabdiraxmaan waa 35 sano jir, heysatana 5 carruur ah, waxay Ergo u sheegtey in mudo lix bilood ah oo Baydhabo barakac ku ahayd ay ku hooyaneysey iyada iyo carruurteeda aqal ka sameysan marooyin iyo baakado la isku geeyey oo aan celin karin qoraxda iyo dhaxanta habeenkii dhacda, balse haatan heshey guri ilmaha kaga gabaadsato roobabka gugga oo haatanba koonfurta soomaaliya meelo ka mid ah ka da,ay.
Barakacyaasha ku dhaqan Baydhabo oo ah ku aad u fara badan dhibaato kala duwan ka cabanaya ayaa waxaa marka la gaaro xili roobaadka gugga soo wajahaya dhibaatooyin ay uga daran tahay dhanka caafimaadka iyo hayga ay ku nool yihiin, iyadoo todobaadkasta ay soo gaaraan barakacayaal hor leh oo ka imanaya degmooyinka go’doonsan ee gobolka Bakool.
