Qaar ka mid ah xildhibaannada baarlamaanka Soomaaliya ayaa walaac ka muujiyay xaaladda barakacayaashii dhowaan laga saaray qaybo ka mid ah magaalada Muqdisho, kuwaasoo aan qorshe kale loo sameyn.
Xildhibaan Cabdisamad Macallin Maxamuud ayaa sheegay inay habbooneyd in dowladda ay meel u hesho barakacayaasha kahor inta aysan ka rarin deegaannadooda.
“Waxay ahayd in laga fekero meesha la geynayo dadka la barakicinayo, sidoo kalena dhismaha laga kiciyay inuu yahay mid markaas loo baahan yahay. Laakiin dhulka laga barakaciyay hadda wax qorshe ah looma hayo wuu iska bannaan yahay,” ayuu yiri Cabdisamad.
“Waxaan aad uga damqanayaa hooyo iyo carruurteeda oo aan heysan meel ay ku hoydaan, oo hoygoodii laga barakiciyay. Waa arrin xanuun nagu heysa, meel ay aadan ma garanayaan.” Ayuu hadalkiisa sii raaciyay.
Xildhibaan Maxamed Cumar Dalxa ayaa isagana sheegay in xukuumadda Soomaaliya ay mas’uuliyad ka saaran tahay dadka ka soo barakacay guryahoodii ee deegaansanaya Muqdisho iyo hareeraheeda. Laakiin aysan ahayn inay qorshe la`aan sii barakiciso. Wuxuuna ugu baaqay maamulka gobolka Banaadir inay arrintan ka fiirsadaan.
Toddobaadkii la soo dhaafay ayaa dowladda Soomaaliya kumannaan qoys barakacayaal ah ay ka saartay guryahoodii ku yaallay dhul bannaan oo ku teedsan xaruntii hore ee ciidamada asluubta ilaa sarkuusta iyo deegaannada ku teedsan. Kuwaasoo haatan qaarkood ku biiray xeryaha kale kuwa kalena ay dulsaar ku yihiin qoysas kale oo aysan heysan hoy kale oo ay aadan.
