Bishaan afarteedii ayey bilaabeen inay ka barakacaan dad lagu qiyaasay tiradooda kun qoys oo degganaa xaruntii hore ee ciidamadda asluubta ilaa sarkuusta ee ku taalla degmada Dharkeynley ee magaalada Muqdisho, maamulka gobolka Banaadir ayaana ku war geliyey inay ka guuraan halkaas, dadkaan oo ahaa barakacayaal horay uga soo cararay Gobolada kale ee wadanka.
Cabdiyo Salaad oo ah 50 jir degganaydna kaam ku yaalay xerada ciidanka Asluubta, waxayna Ergo u sheegtay wixii ku dhacay “Hooyo annagoo fadhina ayaan ala yiri guura, waa markii saddexaad ee aan barakacay, horay waxaan uga soo guuray xero ku taalay xaafadda Barmuuda, markaygii hore waxaan ka soo qaxay gobolka Gedo sanadkii 2002, xilligaas oo abaar jirtay xolahaygii iga dhameeyeen, subaxaan aan guurayo xitaa koob shaaha ma cabin, qosykayguna wuxuu ka kooban yahay afar qof.”
Fadumo Sugaal oo afar carruur ah haysata, “Anniga odaygaygu waa curyaan, annigoo dhar dhaqanaya ayaa cagaf igu soo kalahday, runtii xalay iyo habeen hore waxaan seexday goob aan maro ku bal balaystay, waxaan ahaa beeralay ka soo barakacday degmadda Janaale ee gobolka Shabeelaha Hoose, waxaanan hadda dalbanayaa in dib la iigu celiyo deegaankaygii oo beertaydii aan dib u fasho.”
Mukhtaar Cabdiqaadir isaga iyo xaaskiisa oo bush ka wada dhisanaya duleedka degmada Dharkanley kaam ku yaal oo la yiraahdo Baariyow ayaa Ergo u sheegay “Anniga xero ku taal asluubta ayaan deganaa, afar maalmood gudahood ayaa nala siiyey inaan ka guurno, carruurtaydii ayaan dusha ku qaatay oo la cararay, halkaanna la imid, waxaanan xamaali ka ahay dekedda Muqdisho.”
Madina Shacow Maxamed waa 18 jir haysata ilmaheedii koowaad, waxayna markii hore ka soo barakacday gobolka Shabeellaha Hoose, waxayna codsanaynaa inaysan jirin meel kale oo ay u sii barakacdo, ayse wakhtigaan u bahantahay inay ku noqoto dhulkeedii ay markii hore ka soo tagtay “tan iyo shalay markii bushashkii nalaka dumiyey waxba ma aanan cunnin, ninkaygu dekedduu aadi jiray mana tegin oo waa isla qaxaynay.”
Caasha Cabdi Aadan waa gudoomiyaha xeradda barakaca ee Baariyow waxayna Ergo u sheegtay “395 qoys ayaa kaamkaan saddexdii maalmood ee la soo dhaafay yimid, banaankay ku hoyden dadkaani, waxay haystaan ma lahan, waxay hoy ka dhistaan ma haystaan, biyo ma haystaan banana ayey daadsan yihiin, waxaanan codsan lahaa in dadkaas hoy iyo cunto lala soo gaaro, dadkaan waxay ka yimaadeen xeraddii barakaca ee Asluubta.”
Ma jirto cid weli si rasmi ah u soo tiro koobtay dadkii laga raray xaruntaan, waxayse dadku sheegayaan inay ka badan yihiin, waxayna hadda dadku kala aadeen barakacayaal kala degan duleedada xaafadaha Dayniile iyo Dharkeynlay, weriyaha Ergo ee Muqdisho oo isku dayday inay la xiriirto dawladda hoose ee Muqdisho oo iyadu wadday tan iyo sanadkii 2011 inay banayso goobihii danta guud ee dawladdu lahayd ayaa ka gaabsatay inay ka hadasho qorshay ugu tala galeen dadkaan ay ka saareen xarruntii hore ee ciidanka Asluubtu lahaayeen.
