Sahra Cali Macallim waa afar iyo toban jir ahna ardayad fasalka afraad ee dugsiga hoose, waxayna la kulantay dhacdo khatar ah ka dib markii ay la kulantay qarax bambaano oo la soo tuuray kaasoo dhaawac u gaystey jirkeeda, iyadoo firirkii qaraxaasi dhamaan jirkeeda wada galay.Sahro wuxuu dhaawac halis ahi ka gaaray madaxa, indhaha, lugaha, garbaha iyo meelo kale oo ka mid ah jikeeda, xilligaas oo ay u socotay dugisigeedii.
Sahra waxay gashay xaalad aan degganayn waanay miyir daboolantay. Wax yar ka dib markii qaraxu dhacay waxaa dadkii soo baxay u qaateen in ay dhimatay hase yeeshee cabbaar yar ka dib waxa goobtii qaraxu ka dhacay soo gaaray hooyadeed Faaduma Macalim iyo qoyskeeda waxanay ula carareen xarun caafimaad oo ku taalla degmada Dharkeynley ee magaalada Muqdisho.kadibna waxaa loo sii gudbiyey cusbitaalka weyn ee Madiina halkaasoo ay ku jirtay muddo ka badan bill.
Dr. Maxamad Yuusuf Xasan oo ah agaasimaha guud ee cusbitaalka Madiina ayaa u caddeeyey waalidiinta dhashay Sahra inaan xaaladdeeda dalka gudihiisa waxba looga qaban karin, si gaarana wuxuu sheegay in ay ugu daran tahay labada indhood iyo maskaxda oo firir kaga jiro. Sidaas darteedna haddii aysan helin xarun caafimad oo dalka dibaddiisa ah inay halis ku jito nolosheeda.
Hoyo Faduma Macalim oo ah hooyada dhashay Sahra ayaa waxay dhamaan ka codsanaysaa in hay’adaha samafalka, jaaliyadaha Soomaalida ee ku nool dalka dibaddiisa in ay wixii karaankooda ah u qabtaan gabadheeda oo hadda la il daran xanuun ka haya madaxa, indhaha iyo dhammaan oogada jirkeeda oo uu ka buuxo firir.
