Qaxootiga ku jira xerda Al-kharas ee dalka Yeman ayaa ka welwel ka muujinaya xaaladda ammaan ee dalkaasi oo sii xumaaanaysa waxayna dalbanayaan caawimaad.
Maxamed Cabdi Gurey waa aabe leh lix carruur ah iyo xaas, xerada Al-kharas wuxuu ku noolaa 15 sano mar uu la hadlay Ergo ayuu sheegay in xaaladda ammaan ee dalka ay sii xumaanayso qaxootigana ay yihiin kuwa aan haysan dhaqaalo ayey kaga baxaan halkan, wuxuu intaa ku daray in qoysaskii haystay dhaqaalaha ay u guureen dhanka Soomaaliya oo ay iskood isku dabareen, ” laakiin anaga oo kale ma haysano dhaqaalo aan ku guurno iyo tabar toona, marka waxaan ka codsanaynaa hay’daha inay wax noo qabtaan inta aysan xaaladu xumaan,” ayuu yiri.
Nuurta Cimaan Muumin waa hooyo haysta 10 carruur ah waxay sheegtay in dalkeedii ay uga soo carartay dagaallo haatan ay ku sugan yihiin xaalad khatar ah ayna u baahnayihiin caawimaad deg deg ah oo laga caawiyo sidii ay uga baxsan lahaayeen dagaallada ka socda wadanka Yeman oo maalinba maalinta ka danbaysa ku sii fidaya gobollada dalkaas.
Waxaan nahay qoysas dan yar ah oo qaarkood 20 sano ay qaxooti ku hayyeen dalka Yeman oo carruur haysta oo aan awdoodin maanta inay dhinacna u dhaqaaqaan haddii dagaalku soo gaaro dhanka koonfureed ee wadanka, cidi waxay haysatay way baxeen sidaa waxaa Ergo u sheegtay Miski Faarax Nuur oo ah hooyo haysata 3 carruur ah.
Xerada Al-kharas ayaa lagu soo warramayaa inay ka guureen ilaa 18 qoys kuwaasoo u kicitimay dhanka Soomaaliya oo ka cabsi qaba inay dhibaato ka soo gaarto qalalaasaha siyaaseed ee ka socda dalka Yeman sida uu Ergo u sheegay ku xigeenka gudiga xerada Al-kharas Cismaan Qaasim.
