Dagaal salka ku haya muran dhul beereed cabirkiisu dhan yahay 2300 oo hiktar ayaa keenay inay ku barakacaan 600 oo qoys oo beeralay deganaana tuulooyinka Tuugaareey iyo Gaashaanle oo 15km dhanka bari ka xiga magaalda Jowhar, dagaalka ayaa dhacay maalintii isniinta ahayd ee ina dhaaftay, dadkaan ayaa hadda ku sugan tuulada Raqayle oo koonfur kaga began tuulada Gaashaanley.
Siduu Ergo u sheegay Xaaji Tarax Ciise oo ka mid ah odayaasha deegaanka Gaashaanley dhulkaan ayaa ahaa dhul beereed murankiisu soo taagnaa 60 kii sano ee la soo dhaafay isagoona u dhexeeyey bulshooyinka beeralayda ah ee kala degan labadaan tuulo, Aweys Nuunow Ibraahim oo ka mid ah odayaasha Gaashaanley ayaa isna sheegay in dhamaan qoysaskii deganaa tuuladda oo tiradoodu dhamayd 600 ay ka qaxeen dagaalka.
Xanteey Cali waa haweeyney da,ah kana barakacday tuulada Gaashaanle ayaa shegtay inay ku sugan tahay iyada iyo carruur ay ayeyo u tahay tuulada Raqeyle, “annaga nabad baan rabnaa colaad ma rabno, qof waayeel ah ayaan ahay, ma qaxi karno, reero kalena dulsaar kuma noqon karno.
Nabadoon Yaxye Maxamed Cali oo ka mid ah nabadoonnada tuulada Tuugaareey ayaa radiyaha Ergo usheegay muranka ka bilowday dhulbeereedka in iyagoo kaashanaya ciidamada booliisk loo soo xirxiray 7 oday oo labada dhinac ah maamulka iyo ciidamada boliskana ay ka qeyb qaateen joojinta dagaalka labada dhinac.
Odayaasha deegaanka ayaa sheegaya in muranka dhul beereedkaani soo bilowday xilligii gumeysigii Talyaniga, markii ugu horaysan lagu dagalamay sanadkii 1965, Odayaasha tuulada Raqayle iyo Mukaydheere oo isla deegaanka ah ayaa bilaabay inay u kala dabqaadaan labadda dhinac si dadka qaxay dib loogu celiyo guryahood.
