Weerarada kooxda al-Shabaab iyo howl-galada dabo socda ee ciidamada Kenya ay ka wadaan magaalada xadka ku taal ee Mandheera ayaa saameyn ku yeeshay nolosha qoysaska deegaannadooda kasoo barakacay ee xadka Baladxaawo kasoo talaaba si ay uga xoogsadaan gudaha Kenya. Haweenkan xeryaha degmada Baladxaawo ee gobolka Gedo kasoo shaqo taga ayaa dharka iyo alaabta guryaha u dhaqa qoysaska ladan ee magaalada Mandheera si ay u helaan qarashaad ay reerahooda cunta ugu iibiyaan.
Laakiin Aamina Aadan oo ah hooyo agoonley ah oo heysta todobo carruur ah waxey kasoo qaxday degmada Diinsoor ee gobolka Bakool oo abaaro iyo colaado ay kusoo noqnoqdeen. Toddobadii sanno ee ay ku nooleyd xerada dadka deegaannadooda kasoo barakacay ee Alla Aamin ee degmada Baladxaawo, subax walba waxey u shaqo tagi jirtay magaalada Mandheera oo ay ka xoogsan jirtay.
Laakiin cabsi ay ka qabto in la xiro maadaama aysan heysan sharci ay uga xoogsato Mandheera ayaa hadda ku qasbay inay isaga baaqsato shaqooqinka xoogsatonimada ah ee ay u aadi jirtay Mandheera. Fowsiya Cumar Barre ayaa telfoonka ku wareystay Aamina oo ay weydiisay bal inay sharaxaad ka bixiso noloshooda maadaama aysan iska dhaaftay shaqooyinka ay Mandheera u aadi jirtay.
Aamino: Xaaladiina aad bey u xuntahay. Dhibaatadeenna wax la sheegi karo ma ahan. Magaalada kama shaqeynsan karno. Dagaallo baa jira, dad aan sharciyada heysan baa la qabqabanayaa baa la yiri. Annagana sharci ma heysanno marka waan iska cabsanay oo waxaan ka baqnay in nala xiro marka xeryahaa iska joognaa.
Raadiyoow Ergo: Magaalada aad ka shaqeynsan jirteen oo aad ka cabsateyn waa tee?
Aamino: Waa Mandera oo waxaan ka shaqeynsan jirnay in aan cidaha ladan dharka u dhaqno ama aan dhulka u xaaqno kadibna lacag baan ka qaadan jirnay. Waxaan sidoo kale ka qaadan jirnay cunta ay soo reebaan iyo waxyaabaha qashin qashinka ah sida canjeerada iyo bariiska. sidaas baan ku quudin jiray todobada carruurteyda ah.
Fowsiya: Marka dhaqaale intee la eg ayaad maalintii soo heli jirteen?
Aamino: Wax weyn ma heli jirin. Waxaan heli jirnay labo boqol ilaa saddex boqol oo shilin laakiin nagu ma filnaan jirin. Sidaas darteed, subax walba waan kalahi jirnay oo haddana dhaqar baan dad u soo dhaqi jirnay. Sidaas baan ku nooleyn.
Raadiyoow Ergo: Hadda sidee u nooshiheen?
Hadda, dadka beeraha Malkaariyey oo 7km u jirta degmada Baladxaawo ee gobolka Gedo ayaan soo tuugnaa oo cowska beeraha uga baxa ayaan kasoo guranaa kadibna suuqyada Baladxaawo baan uga iibinaa dadka xoolahaku heysta magaalada. Marka, labo boqol camal baan ka helnaa. Lacagtaas ayaan habeenkii casho ku sameysanaa.
