Waxaa maalintii labaad hakad ku jira isticmaalka buundada degmada Buurdhuubo ee gobolka Gedo, kadib markii roobab xooggan oo ka da`ay deegaanka iyo biyihii webiga Jubba ay dhaawac u geysteen buundadaasi, taasoo saameysay isku socodka dadka,gaadiidka iyo xoolihii ka tallaabayey buundadaasi oo xiriirisa qeybo ka mid ah gobollada dalka iyo xuduudda kenya.
Cali Bishaar Daahir oo ah madaxa horumarinta iyo mashaariicda maamulka degmada Buurdhuubo oo la hadlayey raadiyaha Ergo ayaa sheegay in burbur xooggan oo soo gaaray buundada ay sababtay inay ku amraan gawaarida waaweyn inaysan isticmaalin, iyadoo laga cabsi qabo inay dunto.
Buundada ayaa isku xirta magaalada Muqdisho, koofurta Gedo ilaa gobolka Waqooyi bari Kenya, halkaasoo xoolaha ganacsiga loo wado iyo gawaarida xamuulka ay mari jireen.
Waddooyinka kale ee gobolka ayaa iyaguna ay horaan saameyn ugu yeesheen roobabka, iyadoo qaarkoodna ay go`an yihiin.
Sanadkii 1984tii ayaa la dhisay buundada Buurdhuubo, tan iyo markaasna ma aysan helin wax dayactir ah, sida uu sheegay Xaaji Maxamed Dhoorre oo ka mid ah ganacsatada Buurdhuubo.
Axmed Cumar Saalixi/FM
