Roobab lixaad leh oo sadexdii maamlmood ee la soo dhaafay ka da’ayey qaybo ka mid ah gobolka Nugaal oo watay qabow iyo daadad ayaa khasaaro gaarisiiyey dadka reer miyiyig ah ee ku nool deegaanno dhawr ah.
“Waxaan lahaa 700 oo neef oo ari ah 650 waxay ku le’deen roobabki da’ay maalmihi jimici, sabtidi iyo axaddii hadda waxaa ii haray waa 50 neef oo kali ah oo aad u liita, waxaana laayey qabowga roobabka iyo daadad is wata sidaa waxaa sheegay.” Cabdi Faarax Yuusuf oo ka tirsan xoolo dhaqatada deegaanka Uus-kure oo180 km dhanka barriga ka xigta Garoowe.
Hay’adda maaraynta Masiibooyinka ee maamulka Puntland ayaa ugu baaqaday dadka reer miyiga ah ee jooga dhulka godan inay ka guuraan oo ay raadsaan goobo dugsoon oo ay ku badbaadi karaan dadka iyo xoolaha, maamdaama laga cabsi qabo inay sii socdaan ilaa axadda danbe roobakan bilowga ah, waxanya wataan qabaow iyo daadad sida ay sheegayso saadaasha.
Cabdiraxmaan Cayrow oo ah maareeyaha hay’adda HADMA , ayaa Radio Ego u sheegay in gobollada Nugaal, Bari, Karkaar iyo Sanaag ay ka da’ayaan roob xooggan oo waxyeello u gaysan kara xoolo dhaqatada jooga dhulka godon sidaa darteed dadka waxaan uga digeynaa inay ka fogaadaan meel kasto oo dhibaato ka imaan karto ayna raadsadaan goobo gabbaad ah oo ay ka galaan roobka iyo meelo taag ah kana baxaan toggagga.
Wuxuu sheegay in wali aysan hayn warbixin dhammaystiran oo ku saabsan khasaaraha ay gaysteen roobabka bilowday Jimici balse wuxuu tilmaamay inay yihiin kuwa heerka ay ku socdaan uu yahay mid ka sareeya intii horay loo saadaaliyey.
Cabdiraxmaan Cayrow ayaa sheegay in roobka ka da’ay Qardho iyo nawaaxigeed u gaystay khasaare oo daadadku ay la tageen xoolo fara badan inkastoo wali aan laga helin macluumaad dheeri ah.
Cabdi Faarax Yuusuf ayaa sheegay in deegaanka Uus-kure ay ka mid tahay deegaannadi ay duufaantu ka dhacday sanadkii 2013, Caadiyan markay xooluhu soo maraan abaar kulul ayaa marka uu roob xooggan da’o ay le’daan, guud ahaan Soomaaliya kama di’in roobbakii gu’ga taasoo keentay in ay dhacdo abaar aad u kulul oo saamaysa dadka iyo duunyada roobka hadda curtay waa kii dayrta oo si wayn loo sugaayey walina kama curan qaybo ka mid ah dalka.
Cabdiraxmaan/FO
