Waxaa laga deerinayaa xaaladda nololeed qoysaskii ka barakacay dagaalladii dhowaan ka dhacay deegaanka Saax-dheer ee gobolka sool oo ku sugan deegaan lagu magacaabo togga oo 40 km u jira tuulada Saaxdheer kana xiga dhanka koonfur bari, waxayna dalbanayaan caawimaad deg deg ah.
Si arrintaas aan xog dheeri ah aan uga helno ayaa wariyaha Radio Ergo Cabdiraxmaan Xaaji wuxuu wareysi la yeeshay Xaawo Cabdi oo ah madaxa ururka daryeel oo ka shaqeeya gobolka Sool una qareenna qoysaska ka barakacay Saax-dheer, ugu horrey wuxuu waydiiyey Xaaladda dadkaasi si ay tahay maadaama ay roobab xooggan da’ayaan.
Xaawo: Dadkaas way barakaceen waxay ku nool yihiin dhir hoosteed waxaa intaa u dheer oo hadda yimid roobab wata daadad iyo qabow, mana haystaan waxay ka galaan roobabka iyo meel gabadaan aad bay u dayacan yihiin wakhtigan.
Ergo: Waxaad sheegtay in dhir hoosteed iyo togg ah ay ku nool yihiin bal ka warran saamaynta roobka?
Xaawo: Waad garan gartaa qof aan lahayn hoyi uu ka galo roob wata qabow dhibaatoda uu la kulmayo waana xaalad halis ah oo ay wajahayana carruur iyo haween barakacay uuna baahan wax ka qabasho.
Ergo: Maxay u baahan yihiin dadkaas oo hadda ugu daran?
Xaawo: Waxay u baahan yihiin hoyi, cunno, caafimaad, marar badan ayaan qaylo dhaan u dirnay hay’adaha samafalka iyo maamulka Puntland ilaa hadda wax nooga jawaabo ma haynno marka dadkaasi uma baahna hadal waxay u baahan yihiin wax qabad waayo hadda waxay halis ugu jiraan daadadka iyo qabowga roobka oo waxay joogaan meel tog ah oo biyaha ku soo hoobtaan.
Ergo: Meesha la yiraahdo toogga waxay 40 KM u jirta Saaxdheer roob ayaa ka da’ay ka warran xaalka?
Xaawo: Waa runtaa roob ayaa ka da’ay balse haddi roobku sii xoogaysto khatar ayey ku jiraan dadkaas in biyo qaadaan, waxaa kale oo dhalan karo cudurro.
Ergo: Maxaa hadda hoyi u ah dadkaas?
Xaawo: Baco iyo calalo ay ka samaysteen togga dhexdiisa oo aan roobka celin Karin ayaa hoyi u ah.
Ergo: Ma jiraan qoysas ku noqoday Saaxdheer ?
Xaawo: Waxaa jira qoysas yar oo tagay tuulooyin kale balse wax Saaxdheer ku noqday ma jiraan,
Ergo: Ma jiraan wax gurmad ah oo loo sameeyey?
Xaawo: Maya muddo laba bilood ah oo ay barakac ahaayeen wax loo samyey ma jirto.
Ergo: Ma jiraan ilaa hadda qoysaskan barakacay wax dhibaato ah oo ay u geesteen roobabka da’ay ?
Xaawo: Maya balse dadka barakacay hadda wali roobku dhibaato uma geysan inkastoo cabsi aan ka qabno in ay dhacdo, waayo meesha ay ku nool yihiin waa tog biyo mareen ah, kamana warqabana khatarta roobku gaarsiin karo, waxay u baahan yihiin gargaar bani aadamnimo oo deg deg ah in lala soo gaaro.
Qoysaskan ayaa ka mid ah 250 qoys oo horay uga soo barakacay Tuulada Saaxdheer oo magaalada Laascaanood u jirta 75 km laba bilood ka hor markii ay ka dheceen dagaallo, in kastoo warar kale ay sheegeen in dad aan badneyn ay gaareen Laascaanood.
Cabdiraxmaan Xaaji/FO
