Wasaaradda caafimaadka Puntland oo kaashanaysa hay’adaha WHO , UNICEF iyo UNFPA ayaa tababar saddex bilood ah u bilaabay 20 qof oo 10 ka mid ahi yihiin gabdho barashada howlaha caafimaadka asaasiga ah, kuwaas oo laga soo aruuriyey ilaa 20 tuulo oo ah dhulka ka fog magaalooyinka kana tirsan gobolka Nugaal.
Ardaydaan ayaa baranaya sida loo talaalo carruurta, dhalmadda hooyada, badbadinta qofka dhaawac soo gaaro, sida loola tacaalo qofka masku qaniinno iyo adeegyadda degdegga ah ee caafimaad,
Dadkan ayaa loo laylinayaa in ay adeegyada caafimaadka ee badbaadada hooyada iyo dhalaanka ay gaarsiiyaan tuulooyinka ay ka yimaadeen iyo dhulka miyiga ah, iyagoo qaybtood loo dhiibayo goobo caafimaad oo ay hay’adduhu ka furayaan tuulooyinka aan lahayn.
Maxamed Xirsi Jaamac oo ah madaxa wasaaradda caafimaadka ee Puntland ayaa Ergo u sheegay in dhalinyaradaan la siinayaa tababar adag oo ku salaysan howlaha la rabo in la qabto, kadibna waxay geli doonaan tababar shaqada dhexdiisa ah markay dib ugu noqdaan tuulooyinkooda.
Maxamed ayaa u sheegay kooxdan tababarka qadanaysa inay u diyaar garoobaan shaqo culus oo ay u qabanayaan dadkooda, sida haweenayda foolanaysa, qofka bahalku qaniinay iyo kii bukayba, waayo shaqaale caafimaad oo aan idinka ahayni ma joogaan dhulka la idin tababarayo, wixii aad u qaban kartaan aad u qabataan, wixii idinka aydan wax ka qaban kartaanna aad isaga soo gudbisaan isbitaaladda magaalooyinka.
Hodan Mire o ah madaxa caafimaadka aasaasiga ah ee UNICEF u qaabilsan Puntland waxay sheegtay in ay badan yihiin dumarka dhiig baxa iyo adeeg la’aanta caafimaad ugu dhinta miyiga weliba xiliyada ay dhalayaan, sidoo kale carruurta ayaan iyaguna helin daawayn iyo baaritaano.
Hodan waxay ku boorisay kooxda tababarka qaadanaysa in aysan shaqada ka tegin oo dadka uga faa’iidayaan wixii loo baray. Arrintan ayaa dhowr jeer oo hore dhacday.
Gobolo ka tirsan Puntland ayaa mashruucan horay looga fuliyey, wuxuuna qayb ka yahay barnaamijka nafaqada iyo isku xirka caafimaadka Soomaaliya.
Cabdiraxmaan/MH
