Gudiga gurmadka abaaraha ee degmada Ceelwaaq ee gobolka Gedo ayaa ka digaya xaaladda abaareed ee ka sii daraysa ee ka jirta deegaanno dhowr ah oo hoostaga degmadaas, oo sababtay dhimashada lix ruux inta la ogyahay.
Faarax Macalin Bishaar oo ah gudoomiyaha gudiga gurmadka abaaraha degmada Ceelwaaq ayaa Ergo u sheegay inay ay jiraan dad badan oo la jiifa macaluul iyo nafaqo darro, deegaannada qaar oo aan ka samaynay biyo dhaamin waxaan ku soo aragnay dad la suuxsan oon iyo gaajo oo aan tabar lahayn, waliba waxaa deegaannada qaar ka jira cudurro” Ayuu yiri.
Wuxuu intaa ku daray in ka badan 20 deegaan oo hoos taga degmada Ceel-waaq ay ka sameeyeen biyo dhaamin walina ay wadaan, waxaana ka mid ah Faafax-dhuun, Gariley, Qurac-joome iyo kuwa kale.
Warbixin ay soo saartay hay’adda la socoshada haqab-beelka cuntada ee FEWSNET, ayaa lagu sheegay in xoolo dhaqatada iyo beeraleeyda waqooyiga gobolka Gedo ay saamayn xooggan ku yeesheen abaaraha iyo kulaylka oo sababay inay le’daan xoolo badan.
Cabdullaahi Khalaiif oo ah madax FEWSNET ee Soomaaliya ayaa Ergo u sheegay degaanka uu wakhtigaan ka jiro kulayl daran oo ka kormaray intii caadiga ahayd 4 degree, xoolo dhaqatadii haysatay xoolo u dhaqaaqi karaana ay u guureen gobollada Baay iyo Jubooyinka si ay u heelaan jawi ka duwan kan ka jira deegaannadooda, nolsha dadku hadda waxay ku tiirsan tahay xoolaha oo aan la hayn iib qiimaha leh balse waxay ku nool yihiin dayn dayn ku gaar oo la rajaynayo marka uu roob da’o oo xooluhu daaqaan iibna yeeshaan inay iska bixiyaan daymaha.
Wuxuu sidoo kale sheegay inay jirto cabsi ah haddii roobku da’o in xooluhu dhamaadaan taasoo uu sabab uga dhigay cimilada oo isbadalaysa maadaama hadda uu jiro kulayl daran roobkuna uu keenayo qabaow.
Gudoomiyaha gudiga gurmadka Abaaraha Degmada Ceelwaaq ayaa sheegay in intii abaartu ka jirtay deegaannada hoostada degmada Ceel-waaq ee gobolka Gedo ay ku dhinteen ilaa lix qof oo la xaqiijiyey balse waxaan la soo koobin karin tirada xoolaha ku dhimatay abaarta oo ay ku cayroobeen qoysas aan la qiyaasin karin cadadkooda.
Salixi/MH
