In ka badan 85 deegaan oo ka tirsan gobollada uu ka arrimiyo maamulka Puntland ayaa laga soo sheegayaa inay ka jirto biyo la’aan aad u daran oo dadku ay halis ugu jiraan inay u dhintaan harraad.
Heerka abaartu waa mid ka sii daraysa dhulka xeebalayda ah iyo howdka gobollada Mudug iyo Nugaal, iyadoo qiimaha biyaha ay booyaddii gaartay $300 halka gobollada qaarna ay ku dhowaatay $500 oo dollar, sida Ergo u sheegay agaasimaha gurmadka deg deg ah ee wasaaradda arrimaha gudaha Puntland Cawil Maxamed Xirsi.
Wuxuu intaa ku daray in dabayaaqadii bishi hore iyo bishan ay biyo dhaamin ka sameeyeen deegaanno dhawr ah oo ay ka mid yihiin Dangorayo iyo degmada Eyl oo ka tirsan gobolka Nugaal, biyo la’aanta ugu daran waxay ka jirtaa degmada Jariiban ee gobolka mudug, dhammaan gobolka Nugaal iyo degmooyin ka trisan gobollada bari iyo Sool,” Ayuu yiri.
Cabdiwali Maxamd Saalax oo ka mid ah odayaasha degmada Bargaal ee gobolka Bari ayaa Ergo u sheegay in magaalada imaadeen 20 qoys oo xoolihi intii badnayd kaga le’deen abaarta, qoysaska qaarkood ayaa lahaa ari gaaraya 200 oo neef balse iminka waxaa u soo haray 70 neef oo aan waxba u gayn, dhanka kale degmada Qandala ayaa laga soo sheegayaa xaalad aad u liidato, qiimaha booyadda biyaha waa $400 dollar halka fuustada lagado $25 Dollar.
Cawil Maxamed Xirsi ayaa sheegay inay ku soo ogaadeen kormeer ay ku tageen tuulooyinka Laq-laajis iyo Qalaanqal oo ku yaal hawdka u dhexeeya mudud iyo Nugaal in booyada biyaha la iibinayo $300 oo Dollar halka bishi July ay ahayd $70 Dollar, dadkuna ma awoodaan qiimahaas waayo noolasha dadku waxay ku tiirsanayd xoolaha wayna le’deen abaaraha awgood ayuu yiri.
Wuxuu intaa raaciyey in ay deegaannada qaar ay ka da’een roobab aan badnayn oo aan waxba ka badalin nolasha dadka reer miyig ah, oo u baahan biyo, cunto iyo daawo intaba, mana jirto wax gacan ah oo aan ka helnay hay’adaha caalamka, Puntland horay ayay u sheegtay in in ka badan 350 kun oo qoys ay u baahan yihiin gargaar kuwaasoo ay saameeyeen abaaraha ka jira dalka.
Cabdiraxman Xaaji/FO
