Barnaamijka cuntada aduunka ee WFP ayaa ku boorinaya dadka degan magaaladda Boosaaso inay iska fiiriyaan kaadhadh been abuur ah oo ay ku astaysan tahay sumadda iyo magaca hay’addaan WFP, ayna dad soo been abuurtay kaga iibinayaan dadka ku jira xeryaha barakacayaasha.
Madaxa WFP Soomaaliya Laurent Bukera ayaa sheegay in gebi ahaanba WFP iyo la hawl galayaasheedu aysan marna qaadan wax lacag ah, aysan jirin gargaar bixin lacag lagu bedelanayo, isagoona arrintaan ku tilmaamay hunguri xumo lagula kacayo dad baahan oo ku jira xeryo barakacay.
WFP ayaa sidoo kale ugu baaqday maamulka inay talaabo cad ka qaadaan shakhsiyaadka been abuurka samaynaya, waxayna intaas ku dartay WFP in wixii talaabooyin u baahan cadaymo dheeraad ah oo arrintaan lagu xaqiijinayo laga soo wici karo xafiiska WFP ee Soomaaliya telefonadaan
Hormuud: 0617140164, Golis: 0907053722, Nationalink: 678999014, Somtel: 627795373
WFP ayaa ka caawisa dadka ku jira xeryaha barakacayaasha ee Soomaaliya sidii ay u heli lahaayeen cunto nafaqa leh gaar ahaan hooyada iyo dhallaanka, sidoo kale waxay bixisaa xirfado lagu tayo gelinaya dadka saboolka ah ee ku jira xerayaha barakaca.
Xafiiska WFP – Soomaaliya
