Saddex carruur ah ayaa ilaa hadda la xaqiijiyey inay macaluul ugu dhinteen degmada Waajid ee gobolka Bakool, degmadaan ayaa muddo afar bilood ah go’doon ka ahayd dhammaan wixii sahay ganacsi oo cuntadu ka mid tahay, degmadaan ayaa afar waddo soo galaan, Yeed, Luuq, Baydhabo iyo Rabdhuurre oo hilaadda qiyaas is le’eg u wada jira, dhammaanna afartaas waddo ayaa xiran.
Maxamed Cabdi Xasan oo ah guddoomiyaha urur dhalinyaro oo ka dhisan degmadaas ayaa Ergo u sheegay in xaaladaha hadda ka taagan degmada aan la eegan karin, ayna arkayaan dadkii oo gaajo u dhimanaya, loona baahan yahay gurmad degdeg ah oo lagu samata bixiyo dadka.
Maxamed ayaa sheegay in xaafado ka mid ah ay ku geeriyootay carruurtaani, ayna hadda jiraan dad kale oo badan oo la saxariirsan macaluul, ciidamada AMISOM iyo kuwa dawladda ayaa ay ururkaani ku eedeeyeen inay xaaladda fiirsanayaan oo aysan weli wax tallaabo ah oo gurmad ah samayn.
Dhalinyarada degmada ayaa sheegay inay sameeyeen tirakoob guud oo ay ku sameeyeen toddobaadkaan tirada dadka degmada ku nool, taasoo ay tiradooda ku sheegeen 4850 qoys inay noqotay.
Masuuliyiinta dawladda ee degmooyinka ayaa sheegaya inay jirto sahay raashin gar gaar ah oo loogu tala galay gobolka Bakool oo ku xayiran Baydhabo, Cali Cabdidoon Xalane oo ah agaasimaha guud ee wasaaradda arrimaha gudaha ee Soomaaliya ayaa Ergo u sheegay in gaadiidkaan sahayda sida oo tiro ahaan dhan 25 gaari ay yimaadeen Baydhabo bishii May 3deedii, ilaa haddana aysan u gudbin gobolkii loo waday sahayda ee Bakool, sababahana lagu sheegay ammaanka, waddooyinka oo xun iyo roobabkii xilliga gu’ga oo iyana socodka gaadiidka saamayn ku yeeshay, isagoona intaas ku daray ina ka war hayaan xaaladda cunto ee gobolka Bakool ka jirta ayse hadda wadaan isku day inay gudbiyaan sahaydaan.
Muxiyadiin/MH
