Dadka deegaannadooda kasoo barakacay ee ku nool dhismaha safaaraddii hore ee Ingiriiska ayaa lagu qasbayaa inay si deg deg ah uga guuraan dhismaha. Dad sheeganaya lahaanshaha dhulka ayaa boqol iyo kontan qoys oo ku nool xerada ku wargeliyay in labaatan maalmood gudahood ay ku guuraan.
Qoysaskaas oo abaaro iyo colaado uga soo qaxay guryahoodii ayaa xerada ku noolaa labaatan iyo dhowrkii sano ee lasoo dhaafay. Hooyo agoonley ah oo la yiraahdo Faadumo Aweys Cabdi ayaa weriye Raadiyoow Ergo ka tirsan u sheegtay in lagu amray in labaatan maalmood gudahood ay uga guuraan xerada haddii kale xoog looga saari doono.
“Nolosheenna oo dhan baan halkan ku nooleyn, mana heysanno meel kale oo aan aadno,” ayey tiri Faadumo. Dadka barakacayaasha ah ee xerada ku nool oo ay Faadumo ka mid tahay ma awoodaan inay guryo kireystaan maaddaama horey ay ula daalaadhacayeen nolol maalmeedka ubadkooda.
Kirada guryaha magaalada Muqdisho ayaa sare u kacayay wixii ka dambeeyay markii kooxda Shabaab laga saaray magaalada ku dhowaad saddex sano kahor. Qurba-joogta dib u noqoneysa ayaana kordhiyay baahiyaha guryaha loo qabo, taas oo keentay in boqollaal barakacayaal ah laga raro xerooyin ay ku noolaayeen oo ku yaal dhul dowlo iyo kuwo gaar loo leeyahay.
Si kastaba, Guddoomiyaha degmada Xamar jabab Axmed Cusmaan Dhoorre ayaa Raadiyoow Ergo u sheegay in sharci darro ay tahay in dhulkaa laga saaro barakacayaasha.“Dhulka safaaraddii hore ee Ingiriiska waa dhul dowlo, mana jirto qorshe barakacayaasha looga rarayo halkaa,” ayuu yiri Axmed oo Ergo la hadlay maanta oo Talaado ah. Guddoomiyuhu wuxu ku eedeeyay dadka sheeganaya lahaanshaha dhulkaas inay wataan warqado been abuur ah oo aan jirin, isaga oo xusay in maamulkiisu uu si deg deg ah wax uga qaban doono arrinka.
