Photo | Haraadiga walxaha qarxa/Sawir/Keydka Axmed Taakilo Labada wiil ee dhaawaca ah ayaa loo qaaday isbitaalka guud ee magaalada Gaalkacyo, wiilka geeriyooday oo lagu magacaabayay Sharma`arke, ayaa da`diisu ay ahayd 12jir, waxaana isaga iyo saaxiibbadiis ay ku ciyaarayeen miino ay waddada ka heleen, taasoo markii dambe ku qaraxday.
Baxsan Salaad Xaashi oo ah hooyada dhashay wiilka geeriyooday ayaa sheegtay inay wiilkeeda suuqa wax uga dirsatay, kadibna ay maqashay inay miino dishay.
Baxsan ayaa sheegtay in miinadu ay halis ba`an ku hayso carruurta degmada, oo waxa koowaad ee carruurta looga walwalo ay tahay .
“Maaddaama uu carruurteyda uu isaga ugu weyn yahay baan suuqa adeeg uga diran jiray, carruurta kale inay bannaanka u baxaan umaba oggoli, waxaan uga baqayaa inay faraha la galaan miinooyinka oo ay waxyeello kasoo gaarto. “ ayay tiri Baxsan.
Maamulka degmada Balanballe ee gobolka Galguduud oo kaashanaya hay’adda miino saarista ee Denmark ayaa ole-ole miino saaris ah ka sameeyay deegaanka Balanballe iyo tuulooyinka ku dhow dhow 19kii Luulyo 2013kii, wuxuuna socon doonaa ilaa dhamaadka bisha.
Lama qiyaasi karo tirada rasmiga ah ee miinooyinka ku aasan deegaanka Balanbale oo furin muhiim ah u aheyd dagaalladii Soomaaliya iyo Itoobiya dhex maray 1977, sida uu sheegay madaxa waaxda arrimaha bulshada ee maamulka degmada Balanballe Rijaal Axmed Maxamed, isagoo intaa raaciyay inaysan hayn tirade miinooyinka rasmiga ah iyo calaamado la tix raaco oo muujinaya meesha ay ku aasan yihiin.
Rijaal Axmed Maxamed wuxuu sheegay in miinooyinka oo deegaankaas lagu aasay inta uu socday dagaalkaas ay halis weyn ku hayaan nolosha dadka iyo xoolaha deegaanka muddo 30 sano ka badan.
