Tahriibayaasha Soomaaliyeed oo lagu qafaasho Libya

Waxaa kordhaya tirada dhalinyarada Soomaaliyeed ee tahriibka ah ee lagu qafaasho saxaraha Libya si lacag madaxfurasho ah looga qaato waalidkood. Dhalinyaradaas oo kumannaan ah ayaa sanad weliba dalka uga tahriibaya iyagoo shaqo iyo nolol doon ah. Qaar badan oo tahriibayaasha ka mid ah waxa ay ka qalin-jabiyeen jaamacadaha iyo dugsiyada sare ee dalka.

Wiilka Muxubbo Axmed Shire ayaana ka mid ah koox dhalinyaro Soomaali ah oo lagu heysto saxaraha Libya. Wiilkan oo ka qalin-jabiyey mid ka mid ah jaamacadaha ku yaal degmada Boosaaso ayaa reerka ka dhuuntay si uu ugu tahriibo Yurub isaga oo Itoobiya, Suudaan iyo Libya sii maraya kadib markii uu ku hungoobay in uu shaqo ka helo gudaha dalka.

“Meel walbaan ka raadiyey, kadib buu Addis Ababa iga soo wacay,” ayey tiri Muxubbo oo agoonnimo kusoo korisay ilmaheeda. Laakiin kooxo burcad ah ayaa saxaraha Libya ka qabsaday wiilka Muxubbo, iyaga oo dalbaday lacag madaxfurasho ah oo dhan shan kun oo doollar haddii kale ay dili-doonaan wiilka.

Markaas kadib Muxubbo ayaa ku qasbanaatay inay iibiso guri saddex qol ka kooban oo ay Gaalkacyo ku lahaayeen kadibna ay lacag ka daynsato  dad daris iyo qaraabo ah si wiilkeeda loo sii daayo.

“Ilaa hadda waxaan diray lacag dhan $7,000 doollar, welina waa la heystaa,” ayey Muxubbo u sheegtay weriye ka tirsan Raadiyoow Ergo.