Hay’adda maarraynta qaxootiga iyo barakacayaasha ee dawladda Soomaaliya ayaa sheegaysa in tirada dadka ku biiraya xeryaha lagu barakacay ee guud ahaan waddanka ku yaal ay sii kordhayaan, iyagoo taas u sababeeyey in afar xaaladood oo soo kordhay yihiin kuwa keenay duruufta barakaca, dagaalladii socday saddexdii bilood ee la soo dhaafay, abaartii iyo biyo la’aantii iyo dadkii laga soo tarxiilayey waddamo ay ka mid yihiin Kenya iyo Sacuudi Caraybiya.
Axmed Cabdikariin Daahir oo ah madaxa hay’adda maarraynta qaxootiga iyo barakacayaasha ee dawladda Soomaaliya ayaa Ergo u sheegay in dagaalladii socday saddexdi bilood ee la soo dhaafay, abaarihii iyo biyo la’aantii dhacday xilligii gu’ga ay 70 kun oo qoys ku biireen xeryaha lagu barakacay ee ku yaal waddada xiriirisa Muqdisho iyo Afgooye, dadkaan ayaa ka yimid dhinaca gobollada Bay, Bakool iyo gobollada dhexe, sidoo kale ay gaareen dad aan tiradooda aan la hayn xeryaha ku yaal magaalooyinka Kismaayo, Baydhabo, Beledweyne iyo gobollada Puntland.
Axmed ayaa sidoo kale sheegay in 359 qof oo laga soo tarxiilay Kenya labadii bilood ee ina dhaaftay, iyana dad ka mid ahi ay ku biireen barakacayaasha, inkastoo hay’adda IOM ay gacan ka siisay qaar kamid ah inay u gudbaan gobollada ay asal ahaan u dhasheen.
Xeryaha lagu barakacay ee Muqdisho ku yaal ayaa ay ka jiraan duruufo nololeed, qaar ayaan lahayn biyo, saxo hagaagsan iyo adeegyo caafimaad, toddobaadkii tegey warbixin ay soo saartay sanduuqa badbaadada carruurta qaramada midoobay ee UNICEF ayaa lagu sheegay in 50 kun oo carruur ah una badan dadka barakacay ee Soomaaliya ay yihiin kuwo macluulaya.
Cabdilqaadir/MH
