Cunto la’aan ayaa lagu soo warramayaa inay ka jirto degmada Buuloburde oo ka tirsan gobolka Hiiraan, siduu Ergo u sheegay Cali Nuur Abuukar oo hore uga tirsanaan jiray shaqaalaha dhinaca gargaarka.
“Dhimasho weli lama sheegin laakiin dhibaatada ugu daran hadda waa cunto yaraan, ma jiro wax raashin ah oo soo gala magaalada, si dhuumaalaysi ah ayaa gaari dameerro ay ku keenaan xoogaa cunto ah, dadka wax haysta ilaa Jalalaqsi ayaa gaari dameerro wax uga keenaan, dadka hadda dhibaatadu haysataa waa qoyasaska dadka muruq maalka ahaa”
Cali Nuur ayaa sheegay in wax xooga raashiin ah oo 50 kiish oo bariis ah helikobtarro lagu keenay toddobaadkii tegey, kumase filna baahida jira, ururka Alshabaab ayaana xiray waddooyinkii soo geli jiray degmada.
Cabdifataax Xasan Afrax oo ah guddoomiyaha gobolka Hiiraan ayaa isaguna sheegay in Buuloburde ay muddo toddobo sano ah ay ku jirto xaalad adag, hay’adaha gargaarka ballan qaad ayey sameeyeen welise wax kama hayno, haddana waxaan diraynaa qaylo dhaan tii ugu dambaysay, dhibaatadu ma yara hadda jirta lamana sahlan karo.
Cabdillaahi Salaad/MH
