Beeralley ay saameyn ku yeesheen roobab yaraanta oo kasoo hayaamay deegaanno ka tirsan gobolka Bakool ayaa soo gaaraya xeryaha barakacayaasha magaalada Baydhabo.
Deegaannada Ooflow, Xaafata, Tugeer-hoos iyo Goof gaduud Shabeelow oo ka kala tirsan gobollada Bay iyo Bakool ayaa dadkii beeralleyda ahaa ee muddo sanado deegaanka ku ahaa ayaa haatan soo miciin biday magaalada Baydhabo oo ay hore usii joogeen qoysas badan oo soo barakacay.
80 qoysas ooh or leh ayaa toddobaadkan soo gaaray xerada barakacayaasha ADC1 ee magaalada Baydhabo, iyagoo aysan meesha uga soo horreyn hoy, cunto iyo alaab ay isticmaalaan intaba.
Fartuun Aadan Cabdi waxay ka mid tahay beeralleyda deegaanka Tugeer-hoos oo hoostaga degmada Diinsoor ee gobalka Bay, waxay Ergo uga warrantay sababta ay deegaanka uga soo barakacday.
“Dalaggii beeraha oo Shimbir ay naga fuuqsatey oo wax rajo ah aaney laheyn, wax keyd ahna nooma oollin marka taas ayaa inta i keentey, waxaan heystaa shan carruur ah, aabbahooda waa kasoo tagey, xaaladdeenna aad ayay u adag tahay.” Ayay tiri Fartuun.
Xabiibo Cali Xasan waa 80-sano jir, waxay la timid lix carruur ah oo ay kala soo carartay xaaladda adage e deegaankeeda Ooflow oo Baydhabo 70km dhanka koofureed uga began ka jirtay, waxay Ergo u sheegtey in sanadkan iyada oo rajo fiican aan laga sugeynin beeraha ay ku kalliftay inan soo barakacdo, maaddaama ay ku tiirsanaayeen beeraha.
“Carruurta wax aan siinno ayaa weyney beerihii waa eber, carruurteydu waa agoomo, aniga unbay iga sugayaan wax walba, marka halkan ayaan is iri ar mey dhaantaa.”
Aamino Macallin Aadan oo iyadana kazoo barakacdey deegaanka Haafat ee degmada Diinsoor, oo iyadana ah beeralley, waxay la timid siddeed carruur ah oo agoomo ah sidoo kale, waxay sheegtay in beerteeda oo in sanado ah ay carruurta ku korsan jirtay ay ka quusatay hadda, roobab yaraan darted.
Cabdullaahi Xasan Farey oo ah horjoogaha kaamka ADC1 ee magaalada Baydhabo ayaa Ergo u sheegay in xaaladda dadkan soo barakacy ay aad u adagtahay ayna heysan waxyaabaha nolosha aasaasiga u ah oo hoyga iyo cuntada ay ugu horreeyaan, wuxuuna ugu baaqay hay`adaha gargaarka inay gurmad degdeg ah laoso gaaraan.
Muxudiin Xasan Maxamed/FM
