Roob ka da’ay magaalada Baydhabo ayaa waxyeello u geystay dadka barakacayaasha ah ee ku nool xeryaha ku yaal magaaladaas. Roobka oo toddobo maalin socday ayaa dumiyay guryo cooshado ka sameysan oo ay ku yiil xeryahada dadka deegaannadooda kasoo qaxay ee duleedka degmada.
Dadka ku nool xeryahaas ayaa kasoo qaxay degmooyinka Xudur, Waajid, Buurdhuubo iyo deegaannada ku dhow ee gobollada Bakool iyo Gedo oo uu dagaal ku dhexmarayo ciidamada dowladda iyo kuwa Itoobiya oo wada socda iyo kooxda Shabaab. “Aqalladeennii oo dhan wey dumeen, qaarkoodna biyo baa dhex fadhiya. Meel kale oo aan aadno ma heysanno oo halkan baan gargaar ku sugeynaa,” sidaas waxaa tiri hooyo lix carruur ah leh oo lagu magacaabo Faadumo Shariif Maxamed.
Faadumo waxa ay ka mid tahay dad ku dhow afar kun oo qof oo haween iyo carruur u badan oo kasoo qaxay dagaallada ka socda deegaannada ku dhow xadka Soomaaliya iyo Itoobiya. Dadka barakacayaasha ah oo halkaas ku nool waxa ay sheegeen in aysan helin wax gargaar ah tan iyo intii ay yimaadeen xeryaha duleedka Baydhabo ku yaal saddex bilood kahor.
Haweeney kale oo boqol sano jir ah oo la yiraahdo Edebo Cabdiraxmaan ayaa sheegtay in roobka iyo qabowga ay sii murjinayaan nolosha dadka barakacayaasha ah. “Cunto iyo teendho midna ma heysano. Dharna ma heysanno, waana xanuunsanahay oo qabowga uma adkeysan karo,” Edabo ayaa sidaas u sheegtay raadiyoowga Ergo.
