Kadib markii sanadkan beeraleyda ku dhaqan koonfurta Soomaaliya ay u dadeereen tacbashada beerahooda oo muddo dhowr sano ah dalagyo uga soo go`in abaarihii sanadihii hore oo saameeyay darteed ayaa waxaa haatan beeralleyda ay muujinayaan rajo xumo ku aaddan in dalag fiican uu kasoo go`o beerahooda, sababo la xiriira roobab yaraan.
Luul Cusmaan waxaay ka mid tahay beeralleyda deegaanka Gooyaale oo 7km u jira magaalada Baydhabo, waxay halkaas ku leedahay dhul beereed ay ku beeran yihiin dalagyo kala duwan, waxay ka warrameysaa rajada sanadakan ay qabaan beeralleyda.
“Rajada waa mid xun, waayo roobab nagu filan oo beeraha ay heleen sanadkan ma jirto, marka waxaan qabnaa walwal ah in abaar na gasho, waayo beertan aan u jeedo waxaa laga yaabaa iney kasoo go`aan laba jawaan oo dalag ah bes.” Ayay tiri.
Beeralleyda ayaa sanadkan beertay dalagyada masaggada, gelleyda, digirta, sisinta iyo looska, Macallin Cali Axmed oo beeralleyda gobalka ka mid ah ah ayaa sheegay in sanadkan roobabkii Deyrta aysan dabooli Karin baahida ay beeruhu u qabaan roobab ku filan, muddada dheer aan ee la tacbin darted.
“Sanadkan markii hore roob ayaa helney, haddii aan nahay beeralleyda gobolka nolosheenna waxay ku xiran tahay in aan beeraha dalag fiicn ka helno, aad iyo aad ayaan cabsi u qabnaa sanadkan iney abaar mar kale ka dhacdo gobolka.”
Yaasiin Aadan, wuxuu deggan yahay deegaanka Ray dabaale ee gobolka Bay, wuxuu sheegay in beerahan ay hadda iska beerteen iyagoo doonaya inay noloshooda keliya ku dabbaraan, halka beeraha qaarkoodna ay xoolaha ku daayeen si ay u daaqaan, laakiin aysan ka sugeynin nacfi intaas ka badan.
Gobolka Bay ayaa ka mid ah gobollada koofurta dalka ku yaalla ee ay sida ba`an u saameeyeen abaarihii sanadkii 2011kii ku dhuftay qeybo ka mid ah dalka, waxaana bulshada gobolku ay u badan yihiin beeralley iyo xoolalley.
Muxyadiin Xasan Maxamed/FM/MRS
