Dhakhaatiir ajaanib ah iyo barayaal jaamacadeed ayaa bilaabay in ay Muqdisho isaga baxaan kadib dilka dhakhaatiir Soomaali iyo Siiriyaan isugu jira iyo weliba gabadh macalimad ka aheyd jaamacad magaalada ku taal.
Dhakhtar Siiriyaan ah oo la yiraa Maahir Xuseen oo saddexdii bilood ee ugu dambeysay ka shaqeynayey isbitaalka Fiqi ee duleedka Muqdisho wuxuu ka badbaaday weerar kooxo hubeysan ay ku qaadeen gaari ay la socdeen howl-wadeenno caafimaad oo isbitaalkaas ku sii jeeday arbacadii hore.
Afar ka mid ah dhakhaatiirta ay isla shaqeynayay Maahir oo mid Soomaali ahaa, saddex kalena ay Siiriyaan ahaayeen ayaa lagu dilay weerarkaas, isana dhaawac fudud ayaa ka soo gaaray. Dhakhtar Maahir oo sugayay diyaaradii uu Nayroobi u raaci lahaayeen ayaa gudaha garoonka Muqdisho ugu sheegay weriye Ergo ka tirsan in dilka dhakhaatiirta ay masiibo ku tahay howl-wadeennada caafimaad iyo dadka soomaaliyeed ba.
“Laakiin halkan ma sii joogi karno, waxaase isku dayi doonaa siyaabo kale oo aan dadka Soomaaliyeed u caawin karno,” ayuu yiri dhakhtar Maahir Xuseen. Dhakhtar Maahir oo ahaa howl-wadeenka caafimaadka ee keli ah ee ku takhasusay sanka iyo cunaha ee magaalada jooga ayaa sidoo kale bare ka ahaa jaamacadda caafimaadka ee Banadir.
Toddobaad ka hor dilka dhakhaatiirta, gabadh Yugaandhiis ah oo bare ka aheyd Jaamacadda Soomaaliya ayay dabley aan la aqoonsan ku dileen isla magaalada Muqdisho. Dilalka ajaaniibta ayaa cabsi ku beertay dadka ajaaniibta ah ee magaalada ka shaqeeya.
Dr. Cabdiraxmaan Macallin Fiqi oo ah agaasimaha isbitaalka Fiqi oo dhakhaatiirta la dilay ay ka shaqeynayeen ayaa ugu baaqay dowladda Soomaaliyed inay cadaaladda horkeento dadka ka dambeeyay dilalkaas. “Dilka iyo dhakhaatiirka ka baxeysa magaalada waxa ay saameyn weyn ku yeelaneysaa bukaannada Soomaaliyeed ee adeegyada caafimaad ka heli jiray dhakhaatiirtaas iyo ardeyda jaamacadaha magaalada oo wax badan ka kororsan lahaa macalimiintaas,” ayuu yiri Fiqi.
Yuusuf Keynaan/MR/MRS
