Ra’iisulwasaaraha cusub ee Soomaaliya Cabdiwali Sheekh Axmed ayaa sheegay in caawinta barakacayaasha ay tahay qorshayaashiisa ugu waaweyn, isagoo sheegay inuu hubin doono in barakacayaasha laga acawiyo sidii ay noloshooda dib ugu dhisan lahaayeen.
Mar uu booqasho ku tegay xerada barakacayaasha Rajo oo ay ku nool yihiin 2.400 oo qoys, kana soo barakacay gobolladii ay ku dhufatay macluusha sanadkii 2011kii ayuu raysalwasaaruhu sheegay inuu dareemayo marxaladaha ay ku nool yihiin dadka barakacayaasha ah oo xilligan ay heystaan arrimo dhowr ah, sida kuwa ka soo barakacay abaaro,dagaallo, colaado daba dheeraay iyo daruufo kale loona baahanyahay in la qaado tallaabooyin iskugu jira quudin iyo dib ugu celinta dadka deegaannadii ay ka soo barakaceen.
“Waa muhiim inaan si gaar ah u eegno dadkan barakacayaasha ah, waa dad meehsii ay dhaqaalo ka heli jireen ayna ku noolaayeen kasoo barakacay. Waa inaan kala shaqeynaa sidii ay dib ugu soo kaban lahaayeen.” Ayuu yiri Mudane Cabdiwali.
Raysal wasaaraha ayaa sheegay in waxyaabaha uu wax ka qaban doono ay ka mid yihiin caafimaadka, isagoo sheegay inuu ahmiyad gaar ah siin doono dhismaha wasaarad caafimaad si ay ula tacaasho howlaha caafimaadka, loona soo celiyo adeegyadii caafimaadka bilaashka ahaa.
Dhanka waxbarashadana, wuxuu Mudane Cabdiwali xarigga ka jaray iskuulka Macallin Nuur oo hadda lagu bilaabayo mashruuca aada dugsiyada oo dowladda Soomaaliya ay gacanta ku hayso, taasoo qayb ka ah soo celinta waxbarashadii bilaashka ahayd.”Waxbarashada waa midda kaliya ee looga bad baadi karo dhibaatooyinka, xoogga ayaana saari doonnaa waxbarashada” Ayuu yiri raysal wasaare Cabdiwali Sheekh Axmed.
Waa talaabadii ugu horresay ee uu qaaday raysalwasaaraha cusub ee Soomaaliya arrimaha bulshada gaar ahaan arrimaha barakacayaasha iyo waxbarashada.
Cabdulqaadir Maxamed Cabdulle/FM
