131 Soomaali ah oo laga soo daabulay dalka Koofurta Suudaan ayaa shalay laga soo dejiyay garoonka diyaaradaha caalamiga ah ee Aadan Cadde, ee magaalada Muqdisho.
Dadkan ayaa qeyb ka ahaa 200 oo qof oo ku jiray safaaradda Soomaaliya ee magaalada Juba, caasimadda Kofurta Suudaan, kuwaasoo ay dowladda Soomaaliya u dirtay diyaarad khaas ah oo kasoo daabusha, maaddaama dalkaasi ay dhowr toddobaad ka socdaan dagaallo sokeeye.
Sii hayaha xilka wasiirka arrimaha dibadda Soomaaliya, Marwo Fowsiya Yuusuf Xaaji Aadan ayaa sheegtay in wasaaraddeedu ay dadaal dheer u gashya sidii dadkaasi Soomaalida ah looga soo samata bixin lahaa dalka Koofurta Suudaan, iyadoo sheegtay in dowladda dalkaasi ay ka caawisay arrintan.
“Dadkan iyagoo dalkooda colaado uga qaxay, ayaa haddana markii ay ladnaadeen ee ay degeen uu dagaal kale ku qabsaday Koofurta Suudaan, mar dhow baan tegay halkaas, waxaana ka ballan qaadnay inaan ka caawin doono sidii aan dalka dib ugu soo celin lahayn.” Ayay tiri Marwo Fowsiya.
Kumannaan Soomaali ah ayaa ganacsiyo ku lahaa magaalooyinka Juba iyo Boor oo ka mid ah meelaha ay dagaalladu xooggooda ka socdeen. 2 qof oo Soomaali ah ayaa la xaqiijiyay in dagaalladaasi ay ku dhinteen, halka kuwo kaloo badanna hantidoodii la boobay.
Xaawo Cabdullaahi Cali oo magaalada Juba ku sugneyd muddo 5 bilood keliya, kana tagtay magaalada Muqdisho ayaa sheegtay inay ku go`doontay halkaas, haddana ay aad ugu faraxsan tahay inay dib ugu soo noqoto magaalada Muqdisho.
Marwo Fowsiyo ayaa ugu baaqday Soomaalida kale ee ku sugan Koofurta Suudaan ee doonaya inay dalkooda dib ugu soo laabtaan inay tagaan safaaradda Soomaaliya ee Juba, si looga caawiyo dib usoo noqoshada.
Koofurta Suudaan ayaa waxaa ragaadiyay xiisado beeleed iyo loollan awoodeed oo ka dhex taagan xisbiga talada dalka haya, taasoo cirka isku sii shareertay kaddib markii madaxweyne Salva Kiir uu xilka ka qaaday Riek Machar oo ku xigeenkiisii ahaa horraantii sanadkan. Madaxweyne Kiir ayaa ku adkeysanaya in xiisaddan hadda taagan ay kiciyeen ciidamo daacad u ah Machar 15kii bishan, ilaa 1,000 qof ayaa dagaalladaas ku dhintau, halka 180,000 ay ku barakaceen, sida ay sheegtay QM.
Yuusuf Keynaan/FM
