Boqolaal maxaabiis ah oo ku xiran xabsiga dhexe ee magaalada Baydhabo ayaa cunto yaraan heystaa. Taliyaha xabsiga Gaashaanle Yusuf Macalin Cabdi ayaa sheegay in maxaabiis ka badan shan boqol oo qof ay qarka u saaran yihiin macluul iyo cudurrada ka dhasha cunto la’aanta.
“Maxaabiistu ma aysan helin wax cunto ah 48dii saac ee la soo dhaafay sababtoo ah ma heyno wax aan u karinno,” ayuu yiri Gaashaanle Yusuf oo gudaha xabsiga kula hadlay weriye Ergo ka tirsan. Wuxuu intaa ku daray suurtagalnimada in maxaabiista qaarkood u dhintaan baahi.
Xabsiga oo ay ku xiran yihiin rag ka tirsan Shabaab ayaa cunto yarida ay heystay ilaa horraantii sanadkan. Taliyaha xabsiga wuxuu sheegay in maamulkii hore ee gobolka ay xabsiga ka caawin jireen dhanka cuntada iyo adeegyada kale ee muhiimka nolosha maxaabiista, laakiin xabsigu ma helin kaalmada maamulka gobolka wixii ka dambeeyay markii maamul cusub uu talada gobolka la wareegay bishii Febraayo.
Gaashaanle Yuusuf wuxuu sheegay in xitaa askartii dowladda ee ilaalin jirtay xabsiga ay isaga kala tageen sababtoo ah ma aysan helin wax mushaar amaba cunto ah. “Shan iyo toban askari ayaa xabsiga ilaalin jiray, dhamaantood hadda way tageen,” ayuu yiri Taliyaha xabsiga.
Weriye Ergo ka tirsan oo xabsiga booqday wuxuu arkay hal askari oo keli ah oo albaabka weyn ee xabsiga fura ama xira marka dadku ay soo galayaan iyo marka ay baxayaan.
Xabsiga Dhexe ee Baydhabo oo dib loo howl-geliyay sanadkii hore 20 qof oo lagu xukumay in ay kooxda Shabaab ka tirsanaayeen ayaa bishii Diseember ka baxsaday, wuxuuna taliyaha xabsiga hadda ka digayaa in xabsiga la soo weeraro oo maxabiista la siidaayo amaba in maxaabiista naftoodu xabsiga jabiyaan.
Muxyadiin/MR/MRSA
