Kalluumeysatada ku nool gobollada Gardafuu, Karkaar, Nugaal iyo Bari ee maamul goboleedka Soomaaliyeed ee Puntland ayaa sheegaya inay soo food saartay shaqo la`aan, kadib markii agabkii ay ku kalluumeysan jireen ay burburiyeen duufaannadii dhowaan ku dhuftay gobolladaas.
Guddoomiyaha iskaashatada kalluumeysatada Gardafuu Jaamac Yuusuf ayaa sheegay inay burbureen ku dhowaad 280 agab kalluumeysi, oo ay ku kalluumeysan jireen, “Roobabka iyo duufaannadu saameyn weyn bay nagu yeesheen, waxaana naga burburay saxiimado, shabaago iyo doonyo, mana heysanno qalab kale, taas waxay nagu kalliftay inaan gurayheenna iska joogno oo aan shaqo aadin.” Ayuu yiri Jaamac.
Cabdkariin Maxamed oo ka mid ah kalluumeysatada gabkoodii waayay kuna sugan degmada Eyl ee gobolka Nugaal ayaa sheegay, “Qalabkaasn ku daban jirnay aargoosatada iyo kalluunka ayaa roobab iyo dabeylo shan saac na hayay ay ay badda ku dareen, matoorro aan ka bixinnay 4000 oo doollarka Mareykanka ah ayaa ku burburay. Haddaan nahay dadka degmada Eyl waxaan ku tiirsannahay kalluunka, waxaan kalluunka u dhoofin jirnay dalka Imaaraatka Carabta, halka aargoosatadana aan dalka Yemen u dhoofin jirnay.” Ayuu yiri Cabdikariim.
Wasiir ku xigeenka wasaaradda kalluumeysiga iyp kheyraadka badda Puntland Muuse Geelle Yuusuf ayaa sheegay inay wadaan tirakoob ku aaddan khasaaraha gaaray kalluumeysatada, si ay qiimeyn ugu sameeyaan, si aysan dadkaasi ugu kicin falal dembiyeedyo ay ka mid tahay burcad badeednimada, maaddaama ay shaqo la`aan soo istaageen.
“Guddiga musiibooyinka ee ay dowladdu magacowday ayaan u gudbineynaa warbixintaan soo saarno, iyo hay`adaha mar walba ka caawin jiray kalluumeysatada qalabka kalluumeysiga si wax loogu qabto.” Ayuu yiri wasiir ku xigeenka.
Rudi Van Aaken, oo ah ku simaha madaxa hay`adda QM u qaabilsna cfunnada iyo beeraha FAO Soomaaliya ayaa sheegay in hay`addoodu ay taageeri doonto dadka waxyeelladu ay kasoo gaartay duufaannadaasi, gaar ahaanna kuwa ku waayay xoolahoodii iyo qalabkooda kalluumeysi, maaddaama ay ku tiirsan tahay nolosha dadka ku nool deegaannada la saameeyay.
Xaliima-sacdiya Cabdullaahi Cali/FM
