Leyrar qorraxda ku shaqeeya ayaa lagu xiray xeryaha dadka deegaannadooda kasoo barakacay ee Jowle ee ku yaal duleedka magaalada Garoowe. Iftiinta labada kun ee qoys ee ku nool xeryahaan ay heleen wuxuu wax weyn ka baddalay nolosha iyo ammaanka xeryaha.
Foos Cumar oo ka mid ah howl-wadeennada xarunta dhallaanka iyo hooyada ee xeryaha Jowle ayaa raadiyoow Ergo u sheegtay in kooxo burcad ah oo ka faa’iideysanaya mugdiga xeryaha ka jira ay dil, kufsi iyo dhacba u geysan jiraan dadka xeryaha ku nool.
Laakiin Cadar Xuseen oo ka mid ah haweenka xeryaha ku nool ayaa sheegtay iftiinka iyo ileyska ay ka heleen leyrarka qoraxda ku shaqeeya ee xerada lagu xiray uu wax weyn ka baddalay ammaankooda.
Cadar waxay sheegtay in kooxaha burcada ah aysan hadda kusoo dhiirran karin inay xeryaha usoo dhacaan cabsi ay ka qabaan in la aqoonsado.
Si kastaba, qoysaska soo barakacay ayaa horey u isticmaali jiray faynuusyo iyo qalabka kale ee iftiinka laga helo ee ku shaqeeya shidaalka, kuwaasoo ay barakacayaashu ku bixin jireen lacag badan si ay u helaan.
Cadar waxay sheegtay inay ku faraxsan tahay inay helaan leyrar lacag la’aan ah oo u sahlaya in carruurtooda habeenkii wax aqristaan. Hay’adda Qaxootiga ee Denmark iyo hay’adda caalamiga ah ee socdaalka ee IOM ayaa hirgeliyay mashcuura leyrarka qorraxda ku shaqeeya loogu xiray xeryaha Jowle ee duleedka magaalada Garoowe.
Cabdiraxmaan Xaaji/MR/FM
