Waxaa aad usoo kordhay dadka Soomaaliyeed ee dib ugu laabanaya Soomaaliya kuwaasoo muddo ku noolaa dalka Koofur Afrika, kadib markii dalka Soomaaliya qeybo ka mid ah nabad lagu soo dabaalay, islamarkaasina nidaam dowladeed oo curdun ah uu ka dhashay. Sababaha kale ee dadka u laabanayaan ayaa waxaa ka mid ah dhibaatooyinka ay kala kulmaan Koofur Afrika oo gaaray heer aanan loo adkaysan karin.
Dib u laabashada dadka ayaa bilaabatay bishii Febraayo ee sanadkaan kadib markii la furey safaaraddii ugu horreysey oo Soomaaliya ku yeelato Pretoria, taasi oo sahashay waraaqaha guryo ku laabashada ama Go Home loo yaqaanno, iyada oo laga kaashanayo wasaaradda arrimaha gudaha ee Koofur Afrika.
Siduu radio Ergo u sheegey Idris Maxamed oo madax ka ah shirkadda Kelker oo iyadu ka shaqaysa arrimaha duulimaadka iyo shatiyadda dayuuradaha, ahna tan dadka ugu badan ay shatiyada ka jartaan, toddobaadkii waxaa dalkoodii ku laabata ilaa 40 qof.
Idris wuxuu Ergo u sheegey in dhaqaalaha Koofur Afrika oo hoos u dhacay iyo rabshado soo galooti nacayb, rabshada macdan qodayaasha oo iyana saamayn ammaan ku yeelatay yihiin arrimaha ugu badan ee Soomaalida dhigay rajo la’aanta inay sii joogaan waddanka.
Xasan Maxamed Cali iyo Cabdinaasir Caano waxay ka mid yihiin dhalinyarada Soomaaliyeed ee dalkooda dib ugu laabanaya, waxay Ergo u sheegeen in halkii lagu dili lahaa Koonfur Afrika ay u dhaanto in dalkooda ay ku dhintaan. Waxay sheegeen in ay dhiirri gelin ka heleen nabadda iyo dowladnimada laga soo sheegayo Soomaaliya, doonayaanna in mar uun dalkoodii ku laabtaan dhibaato kasta oo halkaasi ku qabsanatana ay dulqaad u leeyihiin.
Ma ahan oo kaliya in dadka lafahooda ay ku laabanayaan Soomaaliya , ee waxaa jira nacfi iyo faa’iidooyin ay kula laabanayaan Soomaalida sida uu qabo qunsulka safaaradda Soomaaliya ee Koonfur Afrika Maxamed Cali Shire.
Qunsulka waxa uu sheegey in dadka laabanaya ay la laabanayaan xirfado ganacsi, dhaqaale haba yaraadee ay ganacsi iyo maalgashi ku samayn karaan, iyo waliba ilbaxnimo ay ka kororsadeen waddanka ay ku noolaayeen sanadaha ee Koonfur Afrika.
Sanadkani oo kaliya dadka dib ugu laabtay Soomaaliya ee koonfur Afrika ka tagay waxaa lagu qiyaasaa ilaa shan kun oo qof siduu shegay qunsulka safaaradda Soomaaliya ee Koofur Afrika Maxamed Cali, inkastoo ay tiradaasi tahay mid aad u yar marka laga hadlayo dadka Soomaaliya kasoo haajirey ee halkani ku nool, haddana waa tiradii ugu badeyd ee dalka ku laabata.
Dib u noqoshada dadka tirada badan ee qurbaha usoo haajirey waa waxa ugu weyn ee ay dowladda Soomaaliya ku rajo weyntahay in dalka ay wax ka badasho.
Cabdinaasir Axmed Sheekh Bashiir/FM
