Xoola dhaqatada ku nool gobolka Gedo ayaa ka cabanaya cudurro aan la aqoonsan oo ay xooluhu ugu dhimanayaan deegaanka. Boqol neef oo isugu jirta ari, ido iyo lo` ayaa cudurradaas ugu dhintay deegaanno ka tirsan gobolkaas oo ay ka mid yihiin degmooyinka Baardheere iyo Garbahaareey toddobaadkii hore.
Kabow Cabdi oo ka mid ah xoola-dhaqatada deegaanka ayaa raadiyoow Ergo u sheegay in xoolaha ugu badan ku dhinteen tuulooyinka Qotiiley, Dagmareer, Sharaawe, Mataano, Qorijab iyo deegaanno kale oo ka tirsan Luuq.
Takhtar Maxamed Axmed Xayeesi oo ka mid ah takhaatiirta cudurrada xoolaha ee ku sugan Gedo, una shaqeeya hay’adda VSF ayaa raadiyo Ergo u sheegay in aysan weli aqoonsan cudurrada.
Takhtarku wuxuu intaa ku daray in dhawaanahanba ay helayeen warbixinno la xariira xoolo u dhimanaya cudurradaa, haddana ay wadaan baaritaanno ay ku ogaanayaan noocyada cudurradan oo aan horey loogu arkin deegaanka.
Si kastaba, dadka xoolo dhaqatada ah ayaa ka codsanaya hay’addaha gargaarka ee caafimaadka xoolaha ka shaqeeya inay deegaankaa yimaadaan oo ay ka caawiyaan xoola-dhaqatada sida ay xanuunnada uga daweyn lahaayeen xoolaha.
Cumar Saalixi/MR/MRS
