Maamul goboleedka Soomaaliyeed ee Puntland ayaa qorshaynaya hirgelinta mashruuc waxbarasho oo ay ka faa’iideysan doonaan haween ka badan shan iyo toban kun.
Agaasimaha Wasaarada Waxbarashada Puntland Maxamed Cabdi Wahaab ayaa raadiyoow Ergo u sheegay in mashruucan oo toddobaadkan bilaaban doona habluhu ka heli doonaan waxbarasho bilaash ah iyo dugsiyo waxbarasho oo u gaar ah.
“Mashruucaan dugsiyada lagu gaynayo gabdhaha wuxuu sidoo kale dugsiyada ka dhisi doonaa maktabado iyo goobo habluhu si gaar ah ugu kulmaan, waxna ugu akhristaan,” ayuu yiri Maxamed.
Agaasimaha Wasaarada Waxbarashada Puntland wuxuu intaa ku daray in mashruuca kor u qaadista waxbarashada hablaha Puntland oo ay maal-gelisay dowladda Britain ay jawaab u tahay cilmi-baaris dhawaan la sameeyay oo lagu ogaaday in habluhu weli ku yar yihiin dugsiyada iyo jaamacadaha Puntland marka la barbar-dhigo ragga.
Si kastaba, dadaallo iyo wacyigelin gabdhaha ku dheeri-gelinayay waxbarashada oo afartii sano oo la soo dhaafay la waday ayaa keenay in hablaha wax ka barta dugsiyada hoose iyo dhexe ay gaaraan 49%, halka ay 26% ka ahaayeen 2006-tii.
Waxaa sidoo kale kordhay tirada gabdhaha dugsiyada sare dhigta oo gaaray 30%, halka ay iyana horey u ahaayeen 11% afar sanno kahor.
Si kastaba, Maxamed ayaa sheegay in weli baahi loo qabo si sare loo qaado tirada gabdhaha wax barta, si gaar ah kuwo dugsiyada sare. Mashruuca Aada Dugsiyada oo ay Puntland ka heshay labo boqol oo kun, agaasimaha Wasaarada Waxbarashada Puntland wuxuu sheegay in 50% ay siin doonaan gabdhaha.
Cilmi-baarista cusub ee ay Puntland sameysay waxaa lagu ogaaday in 56% caruurta Puntland ee da’da waxbarashada gaaray ay dugsiyada aadin.
