Phillipe Lazzarini oo ah u xiriiriyaha arrimaha bani’aadanimo ee Soomaaliya ayaa ku sheegay war-saxaafadeed uu soo saaray in waqtigaan ay ka soo raynayso xaaladdii Soomaliya ku sugneyd 2011kii oo ahayd xilli ay maculuul xumi soo martay Soomaaliya. Hadalkan uu Lazzarini kuk beegay manta oo ah 19ka bisha Augusto oo ah maalin calamiya oo Qaramada Midoobay u asteeysey arrimaha bani’aadanimo, isla markaasna sare loogu qaadayo horuumarinta wacyiga dadka ee hawlaha gargaarka iyo sidii loo horumarin lahaa, laguna soo xusuusto dhamaan dadkii ku waayey noloshooda iyagoo u adeegaya dad u baahan gargaar bani’aadanimo.
Dhinaca Soomaaliya waxay maalintaani timid iyadoo laba bilood laga joogo markii weerar dhimasho geystay lagu qaaday xaruntii Qaramadda Midoobay ee magalada Muqdisho, waxanan mar kale tacsi u diraynaa naguna reebay xasuus dhamaan qoysaskii iyo dadkii noloshooda ku waayey weerarkaas bahalnimada ah ayuu yiri Phillipe Lazzarini.
Lazzarini mar uu ka hadlayey xaaladaha bani’aadnaimo ee Soomaaliya waqtigaan ayuu ku sheegay inay ka soo raynayso ayna sii yaraanayso macaluushii dhacday 2011kii, tanoo ay ugu wacan tahay gurmadka bani’aadannimo ee la gaarsiiyey dadkii baahnaa iyo roobabkii xilliyadii la soo dhaafay oo wanaagsanaaday, inkastoo weli durufaha ku hareeraysan dadka Soomaaliyeed ay ka dhigayaan kuwo u nugul dhibaatooyinka, iyadoo weli gurmad dhinaca badbaadinta nolosha iyo soo kabashada ah u bahaan yihiin dadka ka badan 2.7 milyan oo qof.
Ilaa sanadkii hore maantoo kale 15 ka tirsan hay’adaha gudaha iyo kuwa calamiga ah ayaa lagu dilay Soomaaliya, taasoo ka dhigtay waddanka Soomaaliya mid ka mid ah goobaha ugu khatarsan calamka ee dhinaca dadka ka shaqeeya arrimaha gargaarka bani’aadanimo.
“Dhibatadaan waxay toos u taabanaysaa dadka shicibka ah ayaana ah kuwa iyagu dhibta dagalladu reebeen ku dhacayso, waana kuwa iyagu duruuftu ku dhacayso gaar ahaan haweenka iyo carruurta” ayuu warsaxaafadeed uu soo saaray xiriiriyaha arrimaha bani’aadanimo ee Soomaaliya ku yiri.
Toddobaadkii tegey hay’adda takhaatiirta aan xudduudda lahayn ee MSF ayaa ku dhawaaqday inay hakisay dhamaan hawlihii ay ka haysay Soomaaliya, tanoo ka dhalatay markii weerarro joogto ah loo geystay shaqaalaheeda, sidoo kale ay ku eedaysay hoggaamiyayaasha bulshada iyo kooxaha hubaysani inay iyagu taageerayaan dhibaataynta lagu hayo hay’adaha gargaarka iyo dadka u shaqeeya.
Filip ayaa sheegay inay tahay dhibaato aan la aqbali karin in la bar tilmaameedsado bulshadii gargaarka ka shaqaynaysa, oo iyagu ku hawlan inay gaarsiiyaan dadka Soomaaliyeed ee baahan adeegyo ay ka mid yihiin caafimaadka, nafaqaynta, waxbarashada, cuntada gargaarka, soo kabashada aasaasiyaadka nolosha, ilaalin, wanaajinta saxada iyo biyaha, haddii aysan dadka Soomaaliyeed ee baahanina heli lahayn gargaarkaan dhibaatadu way sii kordhi lahayd.
MH/MR
