Bulshada ku nool deegaannada webiga ku dhow ee gobolka Shabeelada Hoose ayaa cabsi weyn ka qaba in webiga Shabeelle uu qaraarka jabsado ka dibna ku fataho deegaanka. Dadka deegaanka waxa ay sheegayaan in heerka biyaha webigu ay aad sare ugu kaceen soddankii maalin ee lasoo dhaafay.Tuulooyinka Mareerreey, Sabiib, Canoole iyo Baladul Amiin oo ku dhow degmada Afgooye ee gobolka Shabeellada Hoose ayuu wabigu qarqarrada jabsaday isagoo bilaabay inuu daad ku soo rogo tuulooyinkaas. Tuulooyinkaas oo dhan waxa ay caan yihiin tacabka iyo beeraha oo nolosha iyo dhaqaalaha dadka ku nool halkaasba ay ku tiirsan yihiin.
Jeelle Maxamed oo ka mid ah dadka deegaanka Mareereey ayaa raadiyo Ergo u sheegay in daadadka webiga Shabeele ee kusoo rogmaday tuulada ay bannaanka joogaan ilaa 20 mitir. Jeelle wuxuu intaa ku daray in dadka deegaanka ay haysto cabsi xoogan oo ay u qabaan naftooda iyo dalagyada ay beerteen sanadkan oo ay daadadku halis galinayaan.
Mayoow Cabdi Xasan oo ah beeraleey ku nool tuulada Sabiib oo 8km galbeed ka xigta Afgooye ayaa isna raadiyoow Ergo u sheegay in webigu biyo kasoo rogay labo dhexda tuulooyinka Sabiib iyo Caanoole. Mayoow wuxuu ka digay in haddii wax yar ku kordhaan heerka biyaha webiga labada tuulada biyo galeen noqon doonaan.
“Taas halis ku noqonaysaa nolosha dadka ku nool tuulooyinkaan oo aan gabbaad ka heli doonin biyaha xoogan ee webiga,” sidaas waxaa raadiyo Ergo u sheegay Mayoow Cabdi Xasan. Mayoow wuxuu intaa ku daray in daadku ay sidoo kale baabi’in karaan dalagyada beeraha ee sanadkan la tabcay, welina aan la goosan, iyagoo sidoo kale biya dhigi doono beeraha aan weli la tabcin.
Inkastoo dadka deegaanka ay wadaan dadaallo ay jawaano caro laga buuxiyay ku dhigayaan jiinka webiga si ay biyaha u celiyaan, Mayoow wuxuu aaminsan yahay in heerka biyaha xoogan ku hakan doonin jawaanada carada laga buuxshay, loona baahan yahay caro shub weyn oo laga dhiso qar qarada webiga.
Weriyaha raadiyo Ergo ee gobolka wuxuu sheegayaa in sidoo kale cabsi laga qabo in webigu biyo kusoo rogo deegaannada Afgooye, Awdheegle iyo Janaale, taas oo halis gelin karta nolosha kumanaan dad ah oo ku nool deegaannadaas oo ku qasbanaan doona inay qaxaan. Halista ugu badan waxa ay haystaa dadka ku nool jiinka webiga Shabeele.
Halistu kama jirto Shabeellada Hoose oo keli ah, laakiin mashruuca SWALIM ee saadaasha hawada u qaabilsan hay’adda cuntada iyo beeraha adduunka ee FAO ayaa sidoo kale ka digaya in haddii heerka webiga ShabeelLe sare u kaco ay daadad ku soo rogman karaan degmada Jowhar ee gobolka ShabeelLada Dhexe iyo deegaannada kale ee ku dhow.
Daadad kusoo rogmaday deegaanka jiida Janaale bishi Abril ee sanadkan ayaa barakiciyay boqolaal qoysas ah oo ku noolaa deegaankaas, iyadoo sidoo kale ay baabi’iin dalagyada beeraha.
Adan Dahir/ MR
