Webiga Shabeelle ayaa ku fatahay deegaannada jiinka webiga saaran oo ka tirsan degmada Jowhar ee gobolka Shabeellada Dhexe. Dadkii ku noolaa deegaannada Baarreey Gumbi, Bayaxow, Liinta, Jahweyn iyo Libiga ayaa guryahooda ka barakacay kadib markii fatahaada webiga ay aad u saameysay.
Dadka deegaanka ayaa raadiyo Ergo u sheegay in webiga oo karkaarrada jabsaday masaafo dhan 18km oo uu hoos go’ay. Fataahadda webiga ayaa saameynta ugu weyn ku yeelatay bariga iyo waqooyiga Jowhar oo ay ku nool yihiin dad u badan beeraley, waxayna daadadku baabi’iyiin dalagyada sisinta, galleyda, qudaarta iyo weliba dalagyada kale ee la beertay.
Faadumo Wehliye Dhoorre oo ka mid ah beeraleyda iyo xoolo dhaqatada degmada Jowhar ayaa raadiyo Ergo u sheegtay in dhul beereed 10 hiktar ah oo sisin iyo galley ay ugu beerneyd ay fataahaaddu ka baabi`say.
Saalax Ibraahim Cusmaan ayaa ka mid ah beeraleyda fataahada webiga u geystay ayaa sheegay in soddon jawaab oo badar ah oo beerta u dhex yiillay iyo tacabkiisa kale oo dhan biyaha webiga ay la tageen, laakiin taas wel-wel kuma hayso sida raadiyo Ergo uu u sheegay inuu dadaal ugu jiro sidii uu carruurta iyo qoyskiisa uga badbaadsan lahaa biyaha.
“Cunto waa la iska helaa, laakiin hadda waxaa dhib naga haysta sida aan carruurta ugala bixi laheyn,” sidaas sidaas waxaa ku cataabay Saalax.
Si kastaba, waxaa Jowhar ka jirta cabsi weyn oo ah inuu webiga Shabeelle sameeyo fatahaad ka sii badan tan, dhibaato ka sii daranna uu geysto, daadadkuna iney soo gaaraana meelaha ay hadda dadku ku barakaceen haddii aanan loo sameyn gurmad degdeg ah.
Maryan/MR/MRS
